Զոյա Թադեւոսյան. «33 ընտրատեղամասերում մենք վերահսկողություն չենք ունենա հանձնաժողովի անդամի մակարդակով»
Այսօր հրավիրված ասուլիսում «Ժառանգություն» խմբակցության պատգամավոր և ԿԸՀ-ում կուսակցության ներկայացուցիչ Զոյա Թադևոսյանը հայտարարեց, որ թիվ 8 ընտրատարածքային հանձնաժողովում «Ժառանգություն» կուսակցության անդամ Սերյոժա Հարությունյանը գործարքի մեջ է մտել տեղի իշխանավորների հետ, կաշառք վերցրել և կուսակցության տեղերը այդ ընտրատարածքի ընտրատեղամասային հանձնաժողովներում տրամադրվել են այլ կուսակցությունների ներկայացուցիչների:
«Ժառանգություն»-ում դեռ հաստատ չգիտեն, թե ում են տրամադրվել տեղերը, սակայն կարծում են, որ տրամադրվել է են ՀՀԿ-ին
և ԲՀԿ-ին: Ցավում եմ, որ 439 ընտրատեղամասերից 33-ում մենք վերահսկողություն չենք ունենա հանձնաժողովի անդամի մակարդակով»,- ասաց նա:
«Ժառանգություն» խմբակացության ղեկավար Անահիտ Բախշյանն էլ պատմեց, որ երբ կուսակցությունում պարզել են, որ Սերյոժա Հարությունյանը պատրաստվում է ընտրատարածքային ընտրական հանձանաժողով ներկայացնել կուսակցության կողմից չերաշխավորված մարդկանց ցուցակն ու պահանջել նրանից ներկայացնել իրենց կողմից երաշխավորված մարդկանց ցուցակը, Սերյոժան հիվանդացել է ու հայտնվել Մալաթիա բժշկական կենտրոնում: Անահիտ Բախշյանի խոսքերով` իրեն հիվանդանոցում թույլ չեն տվել տեսնել նրան`ասելով, որ նա շատ վատ է և 3 օր հնարավոր չէ նրան տեսնել: Իսկ երբ Անահիտ Բախշյանը տեղեկանք է ներկայացրել ԿԸՀ` նշելով , որ Սերյոժան հիվանդ է և չի կարող հանձնաժողովների իրենց անդամների ցուցակը ներկայացնել, ԿԸՀ նախագահը չի հավատացել, որ Սերյոժան հիվանդ է: Ըստ Ա. Բախշյանի Սերյոժա Հարությունյանին ախտորոշումը տեղեկանքում եղել է իշեմիկ սրտանոթային նոպա, իսկ Անահիտ Բախշյանի հետ զրույցում բժիշկը ասել է, որ Սերյոժան նաև վախից դեպրեսիայի մեջ է :
Ըստ Անահիտ Բախշյանի`եթե մինչև ժամկետի լրանալը (ընտրությունների օրվանից ոչ շուտ քան 16 օր առաջ ժամը 18.00-ը) կուսակցությունները չեն ներկայացնում իրենց անդամների ցուցակը տեղամասերի կազմավորման համար, ապա այդ թափուր տեղերը տարածքային ընտրական հանձնաժողովի նախագահն իր հայեցողությամբ է նշանակում:
«Եթե նա լիազորված է 3 օրվա ընթացքում հանձնաժողովները կազմավորել և նույն օրը 18. 30 րոպեին արդեն պատրաստ է այն ցուցակը, որը պետք է տեղավորվեր «Ժառանգության» փոխարեն, դա նշանակում է, որ նրանք նախօրոք պատրաստել էին այդ ցուցակը»,-Անահիտ Բախշյանը:
Թիվ 8 ընտրատարածքային հանձնաժողովի նախագահ Օլեգ Գրիգորյանը մերժել է «Ժառանգության» դիմումը: Կուսակցությունը նամակ էր հղել հանձնաժողվի նախագահին `խնդրելով թափուր տեղերը լրացնելու իր լիազորությունը իրացնելիս «Ժառանգություն» կուսակցության ցուցակից մարդկանց ընգրկել` «հաշվի առնելով իրենց անդամի ծայրահեղ առողջական վիճակը»:
Զոյա Թադևոսյանն էլ հավելեց, որ ընտրական օրենսգիրքը թույլ չի տալիս հանձանաժողովի անդամի լիազորությունների վաղաժամկետ դադարեցում առողջական խնդիրների պատճառով:
«Մենք արդեն կարող ենք եզրակացություն անել, թե ինչպիսի ընտրակեղծիքներ են մեզ սպասվում, թե քաղաքական կամքի ինչ աստիճան կա անցկացնելու արդար մրցակցային ընտրություններ»,-ասաց Անահիտ Բախշյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել