«Այս ընտրությունների ձեռագիրը դարձյալ փաստում է, որ ընտրությունները գնում են Հայաստանին բնորոշ խեղված տարբերակով, որտեղ ընթացքի մեջ են դրվել այն մեզ վաղուց հայտնի բոլոր մեխանիզմները` ընտրակաշառքներ, ցուցակների կազմում, վարչական և նյութական, քրեագողական բոլոր ռեսուրսների օգտագործում, շահերի բախում,  որոնք հեռու են լինելուց գաղափարական կամ քաղաքական»,- նախընտրական շրջանին նման գնահատական տվեց ՀՅԴ խմբակցության անդամ Լիլիթ Գալստյանը այսօր «Փաստարկ» ակումբում հրավիրված մամլո ասուլիսում: Լիլիթ Գալստյանը ընտրակաշառք ասելով չի հասկանում քաղաքացիներին 5000, 10000 դրամ բաժանելը: «Ընտրություններից ընտրություն մարդկանց համար շենքերի տակ ինչ-որ կուսակցության անուն գրել և այդտեղ նարդի ու գարեջուր խմելու ինչ-որ ակումբ դարձնելն ինքնին ընտրակաշառք է , քանի որ հոգեբանություն ենք ստեղծում, որ ընտրությունից ընտրություն ինչ-որ մարդկանց համար աշխատանք են ստեղծում: Դպրոցի տնօրեններ գիտենք, որոնց ահաբեկում են, ցուցակներ կազմել են տալիս, շատերին տարածքներ, փոքրիկ ավտոտնակներ, խոստումներ են տալիս , իսկ որոշ մարդիկ անգամ սեփականաշնորհած համայնքներ ունեն»,-իրավիճակն է ներկայացնում Լիլիթ Գալստյանը: Այս գնահատականը տալով  Լիլիթ Գալստյանը եզրակացություն արեց, որ այս անգամ էլ մեզ չի հաջողվի ազատ և արդար ընտրություններ անցկացնել: «Իսկական ժողովրդավարությունում քվեն է որոշում քո քաղաքական վարկանիշը, գրավչությունը և համոզչականությունը, բայց Հայաստանում ԿԸՀ հայտարարած քվեն երբեք չի արտահայտում այս կամ այն քաղաքական ուժի իրական գունապատկերը և նրա ռեսուրսը»,- համոզված է պատգամավորը: Ըստ նրա` հասարակությունը պետք է գիտակցի, որ այս րոպեական խնդիրներ լուծելով` նա վտանգում է իր մայրաքաղաքի բնակիչ լինելու 4 տարին: «Մենք բարձրաձայնել ենք այս խնդիրները, բայց միշտ ունեցել ենք այն համոզումը, որ ունենք ներքին կայունության խնդիրներ և միգուցե մեր բարձրաձայնելը բավարար արդյունավետ չի եղել: Կարծում եմ, որ մենք էլ պետք է ունենանք այն վճռականությունը և սկզբունքայնությունը շատ ավելի հստակ ասելու, իրերն իրենց անունով կոչելու, քանի որ արդյունքը ոչ միայն մեր կուսակցական շահն է, այլև պետական շահը»,- ասաց ՀՅԴ պատգամավորը: Լիլիթ Գալստյանը կարծում է, որ որոշ կուսակցությունների ցուցակներ ընդգրկված թեկնածուները սև PR են այդ կուսակցությունների համար: «Այսօր այս կամ այն ցուցակներում ընդգրկված գործող թաղապետերը ժողովրդի հետ հանդիպում են և անաբուռաբար մարդկանցից փորձում են քվե գողանալ և հավաստիացնել, որ Երևանը կդարձնեն վարդագույն, գեղեցիկ, պայծառ, կանաչ, դրախտային քաղաք, երբ որ իրենք ոչ թե այդ պատասխանատվությունը պետք է մեկ անգամ էլ ստանձնեն, այլ պետք է պատասխան տան նրա համար, թե ինչ են արել Երևանի հետ»,- ասաց նա: Լիլիթ Գալստյանը հայտնեց նաեւ, որ «աղբահանությունից մինչև Երևանի քաղաքաշինական նկարագիրը բազմաշերտ, իրապես քաղաքական պատասխանատվություն և քաղաքական լուծումներ պահանջող խնդիրներ են»: