«Մարդիկ ընտրությունները դարձրել են բիզնես, մեծ մասամբ ընտրողներն էլ ընտրությունները դիտում են ոչ թե համապատասխան ընտրությամբ իշխանության հարցի լուծում, այլ փող աշխատելու եղանակ»,- հայտարարեց ՀՅԴ խմբակցության անդամ Արմեն Ռուստամյանը այսօր լրագրողների հետ հանդիպման ժամանակ: Արմեն Ռուստամյանն առաջարկում է. «Եթե ընտրությունները պետք է գնան կաշառքների ճանապարհներով, հսկայական գումարներ դնեն, որը մեծամասամբ տեղի է ունենում մեծամասնական ընտրություններում, ավելի լավ է աճուրդ հայտարարվի, տարածքը գնեն համապատասխան գումարով, բայց մնացած գումարները դրվի ընտրողների սոցիալական հարցերը լուծելու համար»,- ասաց նա: «Այս ճանապարհներից մենք պիտի մի օր հետ կանգնենք: Իհարկե, սա երկկողմանի խնդիր է: Այսինքն` կաշառք վերցնողն էլ, ինձ թվում է, այդքան ողջունելի գործ չի անում»,- ասաց Արմեն Ռուստամյանը: Բացի այդ, ինչպես ՀԱԿ-ին, այնպես էլ ՀՅԴ-ին լուրեր են հասել, որ փորձ է արվում զինծառայողներին էլ բերել Երևան ու ներգրավել ընտրություններում: Եվ չնայած ասուլիսի մյուս բանախոս, քաղաքապետի դաշնակցական թեկնածու Արծվիկ Մինասյանի համար սա դատապարտելի է, նա հիշեցնում է, որ իրականում ֆորմալ առումով այստեղ օրենքի խախտում չկա. եթե զինծառայողը քվեարկության օրը գտնվում է այն համայնքում, որտեղ հաշվառված է, իրավունք ունի մասնակցել ընտրություններին: Արմեն Ռուստամյանը կարծում է, թե ճիշտ կլիներ, որ ինչպես համապետական ընտրություններում, այնպես էլ Երևանի ավագանու ընտրություններում դրոշմակնիքներ օգտագործվեին. դրա շնորհիվ հնարավոր կլիներ մի քանի անգամ նվազեցնել կեղծիքների թիվը: ՀՅԴ անդամները վստահեցնում են, որ ունեն ընտրությունները վերահսկելու բավականին ներուժ, որպեսզի ընտրախախտումներ տեղի չունենան, ընդ որում` օգտագործելու են նաև մարզերի ռեսուրսը: Բոլոր 439 տեղամասերում ՀՅԴ-ն ունենալու է 3-ական ներկայացուցիչ: «Եթե ամեն մեկն առնվազն իր ձայները վերահսկի, ես չեմ ասում` ուրիշի համար գործ անի, այդ ժամանակ հանձնաժողովը կունենա շահերի առողջ բախում, և շահերի բախումը կբերի նրան, որ ինչ-որ օբյեկտիվ ընտրական գործընթաց կարող է ծավալվել»,- ասաց պրն Ռուստամյանը: Ըստ նրա` իրենք կգնահատեն ընտրությունների վերջնական արդյունքը, և եթե լինեն իրավական առումով կեղծիքները հիմնավորող փաստեր, կդիմեն դատարան: Հարցին, թե` լինելով իշխանության մաս, արդյոք Դաշնակցությունը ընդունում է իր պատասխանատվությունը նախորդ ընտրություններում արձանագրված իրավախախտումների համար, Արմեն Ռուստամյանը պատասխանեց.«Պատասխանատվություն ունեցել ենք 1/8-րդ չափով, իսկ մեկը ութի դիմաց այնքան էլ հեշտ չէ պայքարել»: Արծվիկ Մինասյան էլ հավելեց. «Ցավոք, հասարակությունը Դաշնակցությանը քիչ ձայն է տալիս, բայց պահանջում են բոլորի փոխարեն պատասխանատվություն, տվե'ք շատ ձայն, վստահե՛ք շատ, պահանջե'ք շատ»: Ըստ Մինասյանի` սա անարդար է, քանի որ Դաշնակցությունը պայքարել է, որ ընտրախախտումներ չլինեն: ՀՅԴ ցուցակը գլխավորող թեկնածուն կարծում է, որ ազգային քաղաքապետարանի ձևավորումը առաջին անհրաժեշտություն է Երևանի և ընդհանրապես Հայաստանի համար, քանի որ Երևանի քաղաքապետարանը պետք է կարողանա հակակշռել ու զսպել կենտրոնական իշխանությունների կողմից վարվող քաղաքականությունը: Ըստ նրա` կառավարությունում քննարկվում են օրենքներ, որոնք ուղղակիորեն վերաբերում են երևանցու շահերին, և անհրաժեշտ ընդդիմախոսը բացակայում: Դրա համար էլ ՀՅԴ-ն կարևորում է, որ քաղաքապետը լինի ընդդիմադիր ուժի ներկայացուցիչ, քանի որ «եթե լինի նույն ուժի ներկայացուցիչ, ապա ոչ մի փոփոխություն այստեղ լինել չի կարող»,- ասաց նա: Վերջում Արմեն Ռուստամյանը հավելեց, որ հունիսի 5-ին նշանակված է ԵԽ մոնիտորինգի նիստ, որտեղ ընդգրկված է Հայաստանի հարցը, և Երևանի ընտրությունների ընթացքը և արդյունքների քննարկումը մեծ դեր են խաղալու` արդյոք Հայաստանի հարցը կտեղափոխվի լիագումար նիստ, թե ոչ, և առհասարակ ինչ վերջնական գնահատականի կարժանանա Հայաստանը Եվրախորհրդի կողմից: