Լրագրող-փաստաբան Արգիշտի Կիվիրյանի գործով երկու անձ կալանավորվել է
Շաբաթ օրը` հուլիսի 11-ին, Կենտրոն և Նորք-Մարաշ համայնքների ընդհանուր իրավասության դատարանը լրագրող-փաստաբան Արգիշտի Կիվիրյանի նկատմամբ կատարված բռնարաքի առնչությամբ երկու անձի կալանավորելու սանկցիա է տվել:
Կալանավորված անձանց մասով Ոստիկանությունը և Գլխավոր դատախազությունը որևէ տեղեկատվություն չեն տրամադրում` նշելով, որ նման լիազորությամբ օժտված է ԱԱԾ-ի համապատասխան վարչությունը: ԱԱԾ-ից էլ «Հետքին» հայտնեցին, որ, իրոք, երկու անձանց կալանավորել են, սակայն նախաքննության շահերից ելնելով` վերջիններիս անունները դեռևս չեն հրապարակում:
Հիշեցնենք, որ ապրիլի 30-ի լուսաբացին Նալբանդյան 9 հասցեում` իր տան մուտքում, Կիվիրյանը 3 անձանց կողմից ենթարկվել էր դաժան ծեծի: Հնչել էին նաեւ կրակոցներ, սակայն հանցագործների կրակած գնդակների պարկուճները կասկածելի հանգամանքներում դեպքի վայրից անհետացել էին:
Ոստիկանությունը բռնարարքի փաստի առթիվ հարուցել էր քրեական գործ ՔՕ 117 հոդվածով («Միտումնավոր առողջությանը թեթև մարմնական վնասվածքների պատճառում»): Մայիսի 7-ին գործի քննությունը տեղափոխվեց ԱԱԾ-ի քննչական վարչություն, իսկ ավելի ուշ այն վերաորակվեց ՔՕ 34-104 հոդվածի 2-րդ մասի 7-րդ կետով («Մի խումբ անձանց կողմից սպանության փորձ»):
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել