Մեղրեցիները սպասում են
Այսօր Մեղրիում նախատեսված հանրահավաքը չի կայանա: Հիշեցնենք, որ մեղրեցիները դժգոհում էին կառավարության այն որոշման դեմ, որով միավորվում են «Մեղրիի բժշկական կենտրոն» եւ «Ագարակի հիվանդանոց» ՓԲ ընկերությունները՝ ստեղծելով «Մեղրիի տարածաշրջանային բժշկական կենտրոն» ՓԲԸ:
«Մեղրիի հիվանդանոցի շենքը օտարելուց հետո էլ Մեղրիում հիվանդանոց չի կառուցվի: Մեր հիմնական բողոքը սա է»,-ասում է «Առողջություն ու բարեկեցություն» ՀԿ նախագահ, «Մեղրիի բժշկական կենտրոնի» ընտանեկան բժիշկ, նախաձեռնող խմբի անդամ Նվարդ Խաչատրյանը: «Հանրահավաքը հետաձգվում է, քանի որ երկուշաբթի կայացած Մեղրիի համայնքի ավագանու նիստում Մեղրիի քաղաքապետը հայտարարեց, որ հարցը կարգավորման փուլում է: Մարզպետը մեղրեցիների բողոքը հասցրել է կառավարություն, ու վերանայվում է որոշումը».-ասաց տիկին Խաչատրյանը: «Հետքի»-ի հետ հեռախոսազրույցում Ն. Խաչատրյանը նշեց, որ «չեն ցանկանում նախաձեռնող խմբին ընդունել որպես ընդդիմադիր ուժ և հարցը քաղաքականցնել»: Նախաձեռնող խումբը, որի 10 անդամներից 6-ը Մեղրիի համայնքի ավագանու անդամներ են, պարզապես որոշել են հանրահավաքը հետաձգել ու սպասել կառավարության որոշմանը: Իսկ արդյունք չտեսնելու դեպքում նախաձեռնող խումբը նորից կսկսի բողոքի ակցիան` կոչ անելով փակել միջպետական ճանապարհը:
Մեկնաբանել