Երեկ, ժամը 21. 20-ի սահմաններում, վերջին երեք ամսում արդեն երկրորդ անգամ փլվել է Կապանով անցնող միջպետական մայրուղու թունելի գլխամասային հատվածը։ Եթե սեպտեմբերին փակվել էր քաղաքից դուրս եկող ճանապարհը, ապա այս անգամ մուտքի մոտ էր պատահարը:

Սողանքի հետևանքով հսկայական քարերը ծածկել են ճանապարհի ձախակողմյան մասը։ Սակայն դրանից երթևեկությունը չի տուժել։ Չկան նաև զոհեր ու տուժածներ: Ճանապարհային ոստիկանները դեպքի վայրում անվտանգ երթևեկություն էին ապահովում: Կապանի ճանշինը խոստացել է կարճ ժամկետում քարերից ազատել ճանապարհը։ Թունելը կառուցվել է դեռևս 70-ական թվականներին: Ժամանակին այստեղ հորատման աշխատանքներ են կատարվել: Իսկ պարբերաբար տեղացող անձրևները նպաստել են սողանքին:

Հետաքրքիր է, որ մինչ պատահարը, ճանապարհային ոստիկանները արդեն տեղում էին ու հերթապահում էին: Նրանք ապահովում  էին ՀՀ գլխավոր դատախազ Աղվան Հովսեփյանի մուտքը Կապան: Վերջինս հանգստյան օրերին պետք է մասնակցի 2 միջոցառման. շաբաթ օրը Արծվանիկ գյուղի տարեցների կենտրոնին կնվիրաբերի իր գեղանկարների ցուցահանդեսից գոյացած հասույթը: Իսկ կիրակի կմասնակցի Ճակատեն գյուղի մատուռի բացման հանդիսավոր արարողությանը: