Մեղրիի նախկին քաղաքապետը չի ընդունում մեղադրանքները
Մեղրիի նախկին քաղաքապետ Միշա Հովհաննիսյանը չի ընդունում իրեն առաջադրված մեղադրանքները։ «Ես չեմ իմանում` ում բողոքի հիման վրա են գործ հարուցել, քննչական մարմինն էլ ոչինչ չի ասում»,-«Սոսի» հեռուստաընկերության հետ հեռախոսազրույցում ասել է նախկին քաղաքապետը։ Հիշեցնենք, որ ՀՀ գլխավոր դատախազության տարածած հաղորդագրության համաձայն, ՀՀ ոստիկանության Սյունիքի մարզի քննչական վարչության քննած քրեական գործով պարզվել և հիմնավորվել է, որ Մեղրիի նախկին քաղաքապետ Միշա Հովհաննիսյանը, խախտելով «Անշարժ գույքի գնահատման գործունեության մասին» օրենքը, քաղաքապետարանի հաշվեկշռում գտնվող, քաղաքապետարանի վարչական շենքի 189,2 քառակուսի մետր տարածք ունեցող դահլիճը 5 մլն 675 հազար դրամ շուկայական արժեքով, 2005 թ. դեկտեմբերի 20-ին վաճառել է իր եղբորը` ակնհայտ ցածր գնով, ընդամենը 567 հազար դրամով:
Բացի այդ, 16 մլն դրամ շուկայական արժեք ունեցող համայնքային սեփականություն հանդիսացող Մեղրիի նախկին խճաքարի գործարանի հարեւանությամբ գտնվող 5 հա արտադրական նշանակության եւ 7.5 մլն դրամ շուկայական արժեք ունեցող 15 հա գյուղատնտեսական այլ նշանակության հողատարածքն ակնհայտ ցածր գնով՝ համապատասխանաբար 13 մլն 860 հազար և 551 հազար 250 դրամով վաճառել է ավագանու անդամ Ս. Համբարձումյանին:
Ըստ ՀՀ գլխավոր դատախազության, Մ. Հովհաննիսյանը համայնքին պատճառել է 14 մլն 196 հազար 750 դրամի վնաս: Ձեռք բերված ապացույցների հիման վրա՝ Մ. Հովհաննիսյանին մեղադրանք է առաջադրվել ՀՀ քրեական օրենսգրքի 308 հոդվածի 1-ին մասով։ Մ. Հովհաննիսյանի կարծիքով, ամեն ինչ օրենքով է արվել։ «Կա համայնքի ավագանու որոշումը, անօրինական ոչինչ չի արվել։ Որ պետբյուջեն լցնում էի, ոչ մեկը շնորհակալություն չէր ասում, իսկ հիմա...Քարուքանդ շինությունից քարեր ենք վաճառել մարդկանց, որ տուն սարքեն, կլյաուզյա են անում, շանտաժ»,-ասաց նա։
Սյունիքի մարզի ընդհանուր իրավասության դատարանի դատավոր Նապոլեոն Օհանյանի վարույթում է գտնվում պաշտոնեկան լիազորությունները չարաշահելու համար Մեղրիի նախկին քաղաքապետի նկատմամբ հարուցված քրեական գործը։ Դատվաորը արձակուրդում է` հանրապետությունից դուրս, ու չկարողացանք խոսել նրա հետ։
Ինչպես տեղեկացրեց Միշա Հովհաննիսյանի փաստաբան Մարիամ Աբրահամյանը, դատավորը քրեական գործի կասեցման մասին որոշում է ընդունել։ ՀՀ Քրեական օրենսգրքի 31 հոդվածի 4-րդ կետի 1-ին մասով, երբ մեղադրյալը ծանր հիվանդության պատճաոռվ չի կարող մասնակցել քրեական գործի վարույթին, ու առանց նրա մասնակցության քրեական գործով հետագա վարույթը անհնար է դարձել, գործը անորոշ ժամկետով կասեցվում է։
«Միշա Հովհաննիսյանը անկողնային հիվանդ է, վիրահատել են ոտքերը, ու նա չի կարող տեղաշարժվել։ Երբ նա հնարավորություն ունենա գոնե հենակներով շարժվելու, ապա դատաքննությունը կսկսվի»,-ասաց փաստաբանը։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել