Երդվեց 60 նորակոչիկ
Հունվարի 7-ին 2010-ի առաջին երդման տոնական արարողությունն էր Կապանում տեղակայված զորամասում: Թվով 60 զորակոչիկներ երդվեցին անձնուրաց ծառայել հայրենիքին: Չնայած ցուրտ եղանակին` զորակոչիկների ծնողները հետևում էին իրենց որդիների երդմանն ու շարային քայլքին:
Երևանից Անդրանիկ Կարապետյանը մինչ բանակ գալը այլ պատկերացում ուներ: Գիտեր դժվար է ծառայելը, սոված է մնալու, չի կարողանալու քնել: Լսել էր` Կապանը Սյունիքի մարզկենտրոնն է, ու չէր իմանում, որ մայրաքաղաքից շատ հեռու է: Հեռավորությունն էլ ավելի թանձրացրեց նրա պատկերացումները: Արդեն մեկ ամսից ավել է, ինչ այստեղ է ու այլ կարծիքի է:
«Օրերս հետաքրքիր են անցնում, սնունդը լավ է, նորմալ էլ քնում եմ: Երբ ասացի ծնողներսիս` զարմացան: Չէ, բանակում ծառայելը լավ է, թող սաղ տղերքը ծառայեն»,-ասում է Անդրանիկը` կես կատակ, կես լուրջ ավելացնելով, որ բոլորին խորհուրդ կտա այս զորամասում ծառայել: Երդման արարողությունից հետո ծնողներին ու զինծառայողներին ողջունեց զորամասի հրամանատար, փոխգնդապետ Սամվել Հակոբյանը: Երդման հանդիսությանը իր մասնակցությունն էր բերել ՀՀ սպորտի ու երիտասարդության հարցերի փոխնախարար Խաչիկ Ասրյանը:
Մեկնաբանել