Կրկին բողոքի ալիք Կապանում
«Դինո Գոլդ Մայնինգ Քամփնի» ընկերության (Կապանի նախկին լեռնահարստացման կոմբինատ) հանքի աշխատակիցները հունվարի 17-ից բողոքի ցույց են կազմակերպել: Նրանք կիրակի առավոտվանից աշխատանքի դուրս չեն եկել ու տնօրինությունից պահանջում են աշխատավարձի բարձրացում: «100 հազար դրամ է տալիս, ինչո՞ւ պիտի մտնենք հանք: Նախկինում 220-230 հազար էինք ստանում»,- ասում է Սոս Հախումյանը:
Ըստ բողոքողների` տնօրինությունը խոստացել էր, որ աշխատավարձը կբարձրացնի, բայց առաջընթաց չկա: «Մետաղների գները բարձրացել են, թող մեր աշխատավարձն էլ բարձրացնի: Տնօրենը ասում էր, որ համբերենք, լավ կլինի, մետաղների գներն ընկել են: Էդ ժամանակ աշխատավարձը իջեցրեց, թող հիմա էլ բարձրացնի: Թե՞ մենք իր ստրուկներ ենք»,- ասում է Ս. Հախումյանը:
Կարինե Ավագյանն ու Գայանե Դալաքյանը կոմբինատի հանքում բուժքույր էին աշխատում: Նրանց դեկտեմբերի 1-ից կրճատել են: «Հասկացանք, բայց մեր տեղը ուրիշի վերցրին գործի: Բա որ ավելորդ էին մեր հաստիքները, ինչո՞ւ նոր մարդ վերցրին: Սա անարխիա է, անգլիացին ոնց ուզում, անում է»,- ասացին կանայք: Բողոքողների պատմելով` «տնօրենի կինն է որոշում, թե ինչ անի ամուսինը»: «Տիկին Ֆարիդան օրը 6 հաց է առնում, տալիս փողոցային շներին, մեզ էլ ասում է` յոլա գնացեք: Մենք աշխատենք, ինքը մեր փողով շներին պահի, բա սա կյա՞նք է»,- ասում են հանքագործները: Նշենք, որ գլխավոր տնօրեն Ռոբերտ Ֆալետայի կինը` Ֆարիդա Ֆալետան, ի պաշտոնե գլխավոր տնօրենի օգնականն է։ «Մինչև կնոջ այստեղ տեղափոխվելն ամեն ինչ հանդարտ էր, ու տնօրենը հասկանում էր մեզ: Նրա գալուց հետո ամեն ինչ փոխվեց»,- ասում են հանքագործները: Ըստ բողոքողների` սա գործադուլ չէ, պարզապես իրենց իրավունքները ոտնահարվում են, և իրենք տնօրինության ուշադրությունն են ուզում հրավիրել դրա վրա: Արհեստակցական միության նախագահ Սուրիկ Թումանյանի խոսքով` տնօրինությունը խոստացել է փետրվարի 1-ից աշխատավարձերը վերանայել: «Հանքագործները չեն հավատում, ասում են` շատ են խաբվել, հիմա թող պայմանագիր կնքի, ու հստակ նշվի աշխատավարձի չափը»,- ասում է Ս. Թումանյանը: «Հանրապետության ղեկավարության ենք դիմում, մտածեք մեր մասին: Բա ասում էին` նոյեմբերից աշխատավարձերը կբարձրացնեն, ի՞նչ եղավ: Անգլիացին ձեզ էլ է խաբում: Բոլորիս ազատում, իր մարդկանց է բերում: Ի՞նչ է մտածում նախագահը»,- ասում է Ս. Հախումյանը:
Բողոքողները մտադիր չեն աշխատանքի անցնել, մինչև հստակ պատասխան չստանան: Տնօրինությունն առայժմ ոչինչ չի ասում: Բացի բողոքի ցույցից, մեր ունեցած տեղեկություններով` ձեռնարկությունում ներքին կոնֆլիկտ է հասունանում: Վարչական աշխատողներից ոմանք, ֆինանսական տնօրեն Արա Մարկոսյանի նախաձեռնությամբ, աշխատանքներ են իրականացնում` ազատվելու գլխավոր տնօրեն Ռոբերտ Ֆալետայից։ Շրջանառվող լուրերի համաձայն` Ռոբերտ Ֆալետան մտադիր չէ երկարաձգելու ձեռնարկության համայնքի և լրատվամիջոցների հետ պատասխանատու Ռուբինա Տեր-Մարտիրոսյանի պայմանագիրը: Չի բացառվում, որ Ռոբերտ Ֆալետային նման խորհուրդ տված լինի կինը, քանի որ վերջինս դեմ էր տիկին Մարտիրոսյանի ներկայացրած որոշ ծրագրերի ֆինանսավորմանը, որոնք առնչվում էին համայնքի խնդիրներին: Այդ իսկ պատճառով մեզ չհաջողվեց տնօրինությունից ճշտել տեսակետը: Բողոքի ցույցը շարունակվելու է այնքան, մինչև իշխանության ներկայացուցիչները արձագանքեն:
«Մեծ-մեծ խոսելու փոխարեն, թող գան, հասնեն Կապան, տեսնեն` ինչ է կատարվում»,- ասացին նրանք:
Հ.Գ. Ձեռնարկության տնօրինությունը արգելել էր պահակային ծառայությանը թույլ տալ լրագրողների մուտքը ձեռնարկության տարածք: Սակայն բողոքողների հորդորով` պահակները տեղի տվեցին, ու լրագրողները կարողացան մտնել ձեռնարկության բակ:
Մեկնաբանել