Անցած տարի Ղարաբաղում նոր կուսակցություն չի գրանցվել, բայց նոր կուսկացություն գրանցելու ուղղությամբ աշխատանքներ են ընթանում: Ղարաբաղի քաղաքական դաշտ է մտնում «Քրիստոնյա-դեմոկրատական միություն» կուսակցությունը, որը ղեկավարում է Արցախի պետական համալսարանի դասախոս Վալերի Ավանեսյանը: Նա նախկինում զբաղեցնում էր «ԼՂՀ հանրային հեռուստառադիոընկերություն» ՓԲԸ գործադիր տնօրենի պաշտոնը:  Ըստ ամենայնի` մոտ ժամանակներս արդեն կուսկացությունը պետական գրանցում կստանա եւ կսկսի նախապատրաստվել մի քանի ամսից Ղարաբաղում նախատեսվող խորհրդարանական ընտրություններին: Պատգամավորները կընտրվեն ինչպես մեծամասնական, այնպես էլ համամասնական ընտրակարգով: Ընտրական օրենսգրքում կատարված վերջին փոփոխության համաձայն, ԱԺ 33 պատգամավորներից 17-ն ընտրվելու են համամասնական, իսկ 16-ը` մեծամասնական ընտրակարգով: Ղարաբաղում գրանցված են 9 կուսակցություններ: Այս մասին երեկ հրավիրած մամուլի ասուլիսի ժամանակ հայտարարել է ԼՂՀ արդարադատության նախարար Նարինե Նարիմանյանը: Գրանցված կուսակցություններն են` ՀՅԴ-ն, Արցախի Կոմունիստական կուսակցությունը, Արցախի ժողովրդավարական կուսակցությունը, Արցախի Արմենական կուսակցությունը, «Սոցիալական արդարություն», «Մեր տունը Հայաստանն է», «Ազատ Հայրենիք», «Շարժում-88» եւ «Բարոյական Վերածնունդ» կուսակցությունները: