Սկանդալային պատմություն` «Պատմություն» առարկայից
Փետրվարի 25-ին մեկնարկած դպրոցականների առակայական oլիմպիադայի Սյունիքի մարզային փուլը, թերևս, առանց արտառոց պատահարների կընթանար, եթե սկանդալային պատմությունչգրանցվեր «Պատմություն» առարկայից։ Ըստ Սյունիքի մարզպետարանի կրթության վարչության գլխավոր մասնագետ, մարզային հանձանաժողովի պատասխանատու քարտուղար Նորա Աստարյանի` «Պատմության» առարկայական հանձնաժողովի անդամ, Սիսիանի համար 3 դպրոցի ուսուցչուհի Ռուզաննա Խաչատրյանն իր բարձրության վրա չի գտնվել։
Վերջինիս դուստրը նույնպես մասնակցում էր օլիմպիադային, ու նա ամեն ինչ անում էր հարազատ երեխային առաջ տանելու համար։ Երբ հանձնաժողովն ավարտում է գրավորների ստուգումը, պարզվում է, որ նույն տարիքային խմբից 4 աշակերտ 13 միավոր են ստացել։ Հանձնաժողովի անդամները սկսում են նորից վերանայել աշխատանքները։ «Պարզվում է, որ Ռուզաննա Խաչատրյանը ինքն էր ստուգել իր աղջկա գրավորը ու բարձր միավորներ է դրել։ Դե ասենք, մնացած հանձնաժողովի անդամները հո մեկի ստուգածը նորից չի՞ ստուգելու»,-ասաց Ն. Ասատրյանը։ Այս սկանդալային պատմությունը սկսվեց Սիսիանի համար 2 դպրոցի աշակերտ Սարմեն Ստեփանյանից, ով վերջին 3-4 տարում տարբեր առարկաներից մասնակցել է հանրապետական փուլին։ Ռուզաննա Խաչատրյանը ամեն ինչ արել էր, որ տարածքային փուլում այդ աշակերտը տեղ չզբաղեցնի։ Գործող կարգի համաձայն` օլիմպիադայի հանրապետական փուլերին մասնակցած բոլոր աշակերտները արտամրցութային կարգով իրավունք ունեն մասնակցելու մարզային ու հանրապետական փուլին։ «Ընկեր Խաչատրյանը անընդհատ հարցնում էր, եթե Սարմենը լավ գրի, մասնակցելո՞ւ է հանրապետական փուլին։ Ես էլ ասացի՝ հա, տաղանդավոր աշակերտները պետք է գնան հանրապետկան փուլին»,- պատմում է Նորա Ասատրյանը։ Բողոքարկման արդյունքում միավորները փոխվել են, ու Ռուզաննա Խաչատրյանի դուստրը նույնիսկ մրցանակային տեղ չի զբաղեցրել։ Փոխարենը բարձրացվել են Սարմեն Ստեփանյանի միավորները։ Բողոքարկում կար նաև «Մաթեմատիկա»առարկայից։ Արդյունքում Գորիսի համար 3 դպրոցի աշակերտ Սմբատ Առաքելյանի գրավոր աշխատանքը միանգամից բարձրացվեց 5 միավորով ու 9,5-ով՝ նա 3-րդ մրցանակային տեղում հայտնվեց։ Սմբատը ասելիք չուներ ու միավորը իմանալուց հետո շտապ հեռացավ Սյունիքի մարզպետարանից։ «Ինչ ասեմ, մասնակցել եմ նաև աշխարհագրությունից։ Եթե կարելի ա բարձր դնել, խի՞ չեն դնում»,- ասաց նա։ Նույն առարկայից Կապանի համար 7 դպրոցի աշակերտ Տիգրան Պետրոսյանի աշխատանքի մի մասը չի ստուգվել՝ անհասկանալի պատճառով: Ստուգված առաջադրանքներն էլ ցածր են գնահատվել։ Ի դեպ, Տիգրանը հանձնաժողովի պատասխանատու քարտուղար Նորա Ասատրյանի թոռն է։ Վերջինիս գրավոր աշխատանքն այսօր կտարվի Գորիս, որովհետև հանձնաժողովի անդամների մեծ մասը Գորիսի ուսուցիչներն էին ու պետք է պարզաբանվի, թե ինչու են այսպես ստուգել գրավորը։ Ըստ մասնագետների` 1,5 միավոր գնահատված այս աշխատանքը կարող էր հավաքել 8 միավոր։ Սյունիքի մարզպետարանի կրթության վարչության պետ Լյուդվիգ Հարությունյանը պատրաստվում է մարզպետին ներկայացնել առաջարկություն՝ նկատողություն հայտարարելու այն մանկավարժներին, ովքեր «խաղում են աշակերտների ճակատագրերի հետ»։
Մեկնաբանել