2011 թվականի օգոստոսի 29-ին «Հետքում»  հրապարակված «Չարորակ ուռուցքով կնոջը զրկել են հիվանդության կարգից ու թոշակից» հոդվածում ներկայացված փաստերն ուսումնասիրելու նպատակով ՀՀ աշխատանքի և սոցիալական հարցերի նախարար Ա. Գրիգորյանի 2011թ. սեպտեմբերի 2-ի հրամանով ստեղծվել էր հանձնաժողով: 

Սեպտեմբերի 6-ին  հանձնաժողովը Ալավերդում էր: Հանձնաժողովում ընդգրկված էին նախարարության հաշմանդամների և տարեցների հիմնահարցերի վարչության պետ Ա. Կեսոյանը, նախարարության մի խումբ աշխատակիցներ, ՀՀ բժշկասոցիալական փորձաքննության գործակալության աշխատակից Հ.Օրդույանը, «Վ. Ա. Ֆանարջյանի անվան ուռուցքաբանության ազգային կենտրոնի» պոլիկլինիկական բաժնի վարիչ /համաձայնությամբ/ Ա.Բազիկյանը:  

Հանձնաժողովը, ՀՀ բժշկասոցիալական փորձաքննության գործակալության Լոռու թիվ 3 ԲՍՓՀ-ի նախագահ Ա.Դաղբաշյանի մասնակցությամբ, իրականացրեց ուսումնասիրություն: Այսօր« Հետքը» ՀՀ աշխատանքի և սոցիալական հարցերի նախարարությունից ստացավ հանձնաժովի կատարած ուսումնասիրության արդյունքները: 

Աշխատանքային խմբի կազմակերպված քննարկումներին հրավիրվել էին նաև Օֆիկ Էվոյանը, «Հետք» թերթի լրագրող Լարիսա Փարեմուզյանը, Ալավերդու բժշկական կենտրոնի օնկոլոգիական կաբինետի բժիշկ Հ. Միքայելյանը: 

Հիշեցնենք, որ Հանձնաժողովը ՀՀ բժշկասոցիալական փորձաքննության գործակալության Լոռու թիվ 3 ԲՍՓՀ-ի նախագահ Ա.Դաղբաշյանը քաղցկեղով հիվանդ և գործազուրկ Օֆիկ Էվոյանին զրկել է հաշմանդամության 3-րդ կարգից և 12 հազար դրամ թոշակից: Հանձնաժողովի անդամները պնդում էին, որ այո, Օֆիկ Էվոյանը հիվանդ է C-r-ով, կուրծքն էլ անդամահատված է, սակայն հիվանդության 6-րդ տարում նա իր օրգանիզմում չարորակ ուռուցքի մետաստազներ չունի, ուստի՝ նրան հաշմանդամության կարգ չի հասնում:  

Այս գնահատականները հանձնաժողովի անդամները տալիս են ՀՀ առողջապահության նախարարության  ուռուցքաբանության ազգային կենտրոնի կողմից 2007թ.-ին հիվանդին տրված տեղեկանքի համաձայն, որտեղ հայտնվում էր, որ Օֆիկ Էվոյանի լյարդի վրա կան չարորակ ուռուցքի մետաստազներ, սակայն հիվանդի բուժումներից հետո հերքվել է լյարդում մետաստազների գոյությունը և ախտորոշվել է լյարդի  հեմանգոմիա: 

«Մի հատ սենց մի հարց. 2007թ-ից ասում եք մետաստազ չկա, տեսնենք՝ ի՞նչ վատացում եք տեսել: Թեկուզ վերցնենք ՕՆԿՕ ֆոնը, այնտեղ միոմիա մատկի, 4 տարի առանց ռազմատկի կմնար առանց որևէ բուժման: Ոչ մի դեպքում: Ոչ դեղ է ստանում, ոչ ճառագայթ, ոչ քիմիա: Տեմ բոլե, դուք ասում եք՝ դինամիկայուն հսկում եք: Ի՞նչ եղավ էդ ՕՆԿՕ նաստառոժնոստը: Ի՞նչ դեղեր եք տվել, որ յաիչնիկի մետաստազը չի աճել, կամ արգանդի ռակը չի զարգացել: Հիվանդության դինամիկան դրական է, հիվանդը լավացել է  ուռուցքից»,- ասաց հանձնաժողովի գլխավոր մասնագետ Հենրիկ Օրդույանը, ով Ալավերդու ՕՆԿՕ բժիշկ Հարություն Միքայելյանին մեղադրում էր Օֆիկ Էվոյանին  հիվանդության կարգ ստանալու հարցում աջակցելու համար: 

«Հետքի» հարցին, թե որպես մասնագետ երաշխավորում եք, որ C-r-ով հիվանդ Օֆիկ Էվոյանն այժմ առողջ է, ուռուցքաբանության  ազգային կենտրոնի պոլիկլինիկական բաժնի վարիչ, օնկոլոգ Արա Բազիկյանը պատասխանեց. «Իհարկե, ոչ: Ով  ուռուցքաբանության մեջ կասի 100 տոկոսով քեզ կարամ բուժեմ, ինքն ամենաքիչը անգրագետ է»: 

Այսուհանդերձ, դժվար է ասել, թե ինչ դրդապատճառներով է, որ հանձնաժողովը շրջանցում էր Օֆիկ Էվոյանի հիվանդության անկետային կցված ուռուցքաբանության ազգային կենտրոնի կողմից տրված 2010թ.-ի հունիսի 6-ին N 583/05 տեղեկանքը: Տեղեկանքը ստորագրված էր նույն Արա Բազիկյանի կողմից: Օնկոլոգ Բազիկյանը նույնպես 2010թ.-ին իր կողմից ստորագրված տեղեկանքը շրջանցելով գտնում էր, որ Օֆիկ Էվոյանին հաշմանդամության կարգից զրկելը բխում է օրենքից:

Իսկ նրա 2010թ-ի հունիսի 6-ի ստորագրած տեղեկանքում Օֆիկ Էվոյանի առողջական վիճակի մասին հայտնում է. «Ձախ կրծքագեղձի C-r, քայքայումով: Վիճակը ռադիկալ մաստեկտոմիայից հետո հյուսվածքաբանական քնն. Ն 1058-66/05ինֆ. ծորանային C-r: Ներկայումս  լյարդը դիֆուզ փոփոխված է, ձախ բլթում առկա է հեմանգոմիա: Արգանդը միոմատոզ,  փոփոխված է, ձախ ձվարանում`կիստա: Նշվում է ձախ վերին վերջույթի և ուսահոդի  շարժումների խիստ սահմանափակում, զգացողության բացակայություն ամբողջ թևի երկայնքով լիմֆոստազ: Հիվանդի մոտ ենթադրվում է գլխուղեղի ուռուցքային գոյացություն, որի համար  խորհուրդ է տրվում  MRT հետազոտություն: Գտնվել շրջանային բժշկի խիստ հսողության տակ և ներկայանալ կրկնակի հետազոտության»:  

Ուռուցքաբանության ազգային կենտրոնում  գլխուղեղի ուռուցքային գոյացություն ենթադրվող` հիվանդության 3-րդ կարգ հաշմանդամի  հետազոտությունը թերի է մնացել` Օֆիկ Էվոյանի անվճարունակության պատճառով: Նա չի կարողացել վճարել 89 հազար դրամ և անցնել MRT հետազոտությունը: Թիվ 3 բժշկասոցիալական փորձաքննական հանձնաժողովն ուռուցքաբանության ազգային կենտրոնի այս տեղեկանքը հիմք ընդունելով`պարտավոր էր ՀՀ կառավարության 2004թ.-ի մարտի 4-ի N 318-N «Պետության կողմից երաշխավորված անվճար բժշկական օգնության և  սպասարկման մասին» (տես ցանկը որոշման հավելված 1-ում)  որոշման համաձայն պետպատվերի շրջանակներում Օֆիկ Էվոյանին ուղեգրել լրացուցիչ հետազոտության, նրա կենսագործունեության վրա հիվանդության իրական ազդեցությունը պարզելու համար:  

Վերջինիս փոխարեն, հիմք ընդունելով տեղեկանքը, բժշկասոցիալական փորձաքննական հանձնաժողովը 2010թ.-ին Օֆիկ Էվոյանի համար սահմանել է հիվանդության 3-րդ կարգ:  

Մինչդեռ արմատական հետազոտման արդյունքում չի բացառվում, որ Օֆիկ Էվոյանը  կստանար հիվանդության 1-ին կամ 2-րդ կարգ: Մի հետաքրքիր փաստ էլ կա.  ուռուցքաբանության ազգային կենտրոնի պոլիկլինիկայում Օֆիկ Էվոյանի 2011թ.-ի մայիսի 13 -ի հետազոտության տեղեկանքում, հավանաբար, նկատելով հիվանդի անվճարունակությունը, նրա գլխուղեղի չուսումնասիրված ուռուցքային գոյացությունը  շրջանցել են, այն դեպքում, երբ C-r-ով հիվանդը անվերջ բողոքում է գլխապտույտներից, օրեցօր վատացող տեսողությունից և լսողությունից: 

«Բայց ես գլխապտույտներ ունեմ, շատ վատ կզգամ, տեսողությունս օրեցօր վատանում է: Բռնում եմ մի տեղից, որ վայր չընկնեմ»,- հանձնաժողի անդամներին իր առողջական վիճակը ներկայացնում էր տիկին Օֆիկը:   

Հիվանդի գանգատների վտանգները վերջապես մտահոգեց օնկոլոգ Արա Բազիկյանին. «Քանի որ մեր ուռուցքային հիվանդն եք, մի փոքր հնարավորություն կտանք, որ, եթե  հիվանդության կարգը դաժե դուրս է եկել, բայց հիմա սենց դեպքերի համար, հիվանդն ասում է, բայց, դե ես վափշե լավ չեմ, կարող է հիվանդության հետ կապ չունի, բայց թե ընդհանուր հիվանդն իրեն լավ չի զգում: Մենք, հենվելով առաջնային դիագնոզի վրա, պետք է տեսնենք, իսկակա՞ն է, որ օնկոլոգիայի հետ որևէ կապ չունի: Ախր, երևի մի խնդիր կա, որ չի թողնում այս կնոջը լիարժեք աշխատի»,- ասաց Արա Բազիկյանը: 

Արա Բազիկյանն Օֆիկ Էվոյանին օգնության կարգով առաջարկեց  գնալ Երևան և անցնել MRT հետազոտություն. «Ամսի 21-ին՝ ժամը 11-ին, կլինեք լեչկամիսիայում»,- ասաց նա: Ու մինչ օնկոլոգ մտահոգված էր հիվանդի վիճակով, հանձնաժողովի նախագահ Արթուր Կեսոյանը, չսպասելով MRT հետազոտության վերջնական արդյունքներին, Օֆիկ Էվոյանին շնորհավորեց առողջ լինելու համար և առաջարկեց իր աջակցությունը`Ալավերդու զբաղվածության կենտրոնի միջոցով նրա համար աշխատանք գտնելու գործում. «Ախր ես էլ կուզիմ աշխատել, բայց չեմ կարա»,- ասում էր տիկին Օֆիկը:  

Վերջինիս գանգատն այդպես էլ մնաց անպատասխան հանջնաժողովի նախագահի կողմից: Նիստի վերջում Արա Բազիկյանը, «Հետքի» հարցերին պատասխանելով, ասաց, որ մարդկայնորեն քաղցկեղով հիվանդ մարդուն մետաստազ չունենալու պահին  հիվանդության կարգից զրկելը ճիշտ որոշում չի համարում. «Ձեզ ավելին կասեմ, կոմունիստների ժամանակ  քաղցկեղով հիվանդին հաշմանդամության կարգ  3 տարով էին տալիս, էս քաշքշուկը չկար: Հիմա, քանի որ կան խոսակցություններ, որ որոշ կազմակերպություններ պետության փողերը փոշիացնում են, պետությունը որոշեց խիստ լինել՝ չգիտակցելով, որ դրանով ավելի շատ օնկօ հիվանդին նեղություն է տալիս»: 

Ասենք նաև, որ նախարարի ուղարկած հանձնաժողովի նիստին թիվ 3 բժշկասոցիալական հանձնաժողովի որևէ անդամ չէր մասնակցում: Վերջիններիս փոխարեն նիստին, չգիտես ինչու, ներկա էին ալավերդցի երեք կինք: Կանանցից պարուսույց Լուզիա Ծատուրյանն ասաց, որ Արման Դաղբաշյանը շատ լավ տղա է,  Անժիկ Կիլինկարովն իր պաշտպանյալի պատվին լեզվակռվի մեջ մտավ իր իրավունքների համար պայքարող հիվանդ կնոջ հետ, իսկ Շողիկ Սաքանյանն էլ իր քաղցկեղով հիվանդ մորը, ով արդեն մոտ 1.5 տարի է՝ հանգուցյալ է, կարգ սահմանելու համար ասաց. «Ես Արմանից շատ գոհ եմ, շատ»: