«Դինո Գոլդ Մայնինգ Քամփնի» ընկերությունը (Կապանի նախկին լեռնահարստացման կոմբինատ) պատրաստ է մինչև այս տարվա ապրիլի վերջը փոխհատուցել Շահումյան ավանի բնակիչների ծախսերը: Հիշեցնենք, որ բնակիչները դիմել էին դատարան` պահանջելով կանխել մարդկանց կյանքի եւ առողջության համար վտագավոր ռիսկերը:

Խնդիրն այն էր, որ Շահումյան ավանի տարածքը վտանգավոր գոտի է, քանի որ նրա տակ գտնվող ստորգետնյա հանքահորերը շահագործում է ընկերությունը: Այս տարվա փետրվարի 17-ին, Սյունիքի մարզի ընդհնաուր իրավասության դատարանում ընկերության գլխավոր տնօրեն Ռոբերտ Ֆալլետտան եւ 20 հայցվորների ներկայացուցիչ, փաստաբան Իրինա Մանուկյանը ստորագրեցին հաշտության համաձայնագիր, ըստ որի` վաճառքի է հանվելու բնակիչների գույքը, իսկ ընկերությունը իր հերթին պարտավորվում է շուկայական գներով ձեռք բերել այդ սեփականությունները:

Ըստ ընկերության կառավարության ու հանրության հետ կապերի պատասխանատու Նորայր Աղայանի` ձեռնարկությունը փոխհատուցելու է ոչ միայն դատարան դիմածներին, այլեւ բոլորին: Արդեն կազմվել են ցուցակները, գույքագրումն ու հաշվարկը կատարել է հատուկ արտոնագիր ունեցող երևանյան կազմակերպություն։ Ամբողջ գործընթացը, ընդհուպ մինչև վճարումը, նախատեսված է ավարտել ապրիլի վերջին։ Մնում է միայն բնակիչներին հորդորել, որ չմշակեն հողամասերը: Բնակավայրը հետագայում վեր է ածվելու բաց հանքի: Այս պահին նախագծահաշվարկային աշխտանքներ են իրականացվում: Բաց հանքը հնարավորություն կտա նոր աշխատատեղերի բացման: Սակայն Նորայր Աղայանը դժվարացավ որոշակի թվեր ու ժամկետ նշել։ «Էկոլոգիական անվտանգության ապահովման եւ ժողովրդավարության զարգացման» hասարակական կազմակերպությունը կրկին դիմել է դատարան՝ պահանջելով պարտավորեցնել ընկերությանը՝ իրեն տրամադրել բնապահպանության նախարարության կողմից 2009թ. իրականացված ստուգումների մասին տեղեկատվություն:

Նորայր Աղայանը չհերքելով փաստը՝ նշեց, որ իրենք չեն պատասխանել նամակին, չեն էլ տրամադրելու տեղեկատվությունը։ Ձեռնարկությունը իր առարկությունները կներկայացնի դատարանում։ Նորայր Աղայանի խոսքով` կազմակերպությունը հղում է արել «Տեղեկատվության ազատության մասին» ՀՀ օրենքին, ըստ որի, «Դինո Գոլդ Մայնինգ Քամփնիի» նման ընկերությունները պարտավոր չեն տեղեկատվություն տալ:

Ամեն դեպքում, ընկերության ներկայացուցիչը վստահեցնում է, որ ձեռնարկությունը հավատարիմ է իր դիրքորշմանն ու եռամսյակը մեկ հանրությանը կներկայացնի ֆինանսական հաշվետվությունները։ «Մի բան հստակ է, որ գաղափարական մեր հակառակորդներն են բազմիցս հայտարարել, որ մենք բաց ենք աշխատում»,-ավելացրեց Նորայր Աղայանը՝ չմանրամասնելով, սակայն, թե ովքեր են գաղափարական հակառակորդները։