Վիշապօձ` Սյունիքի մարզկենտրոնում
Երկուշաբթի Կապանի միջով հոսող Վաչագան գետի կամուրջներից մեկի վրա իրարանցում էր։ Երկու քաղաքացիներ 3 մետրանոց հսկա օձ էին հանել գետից՝ անգլուխ եւ անմաշկ։ Անմիջապես մարդիկ իրար գլխի հավաքվեցին, և ներկաներից ոչ մեկը չհիշեց քաղաքում պատահած նման որեւէ դեպք։
Թե ինչպես է սողունը հայտնվել այս վիճակում, ոչ ոք չկարողացավ պատասխան գտնել: «Գլուխը չկարողացանք հանել, մարմինը լարով ենք բարձրացրել»,- ասում է Միշա Առաքելյանը։ Մեկ ուրիշի` Էդվարդ Գրիգորյանի կարծիքով էլ` օձի մարմինը ձկները կամ էլ ագռավներն են լափել։ Կային այլ տարբերակներ, մասնավորապես` սպանել ու աղբարկղը նետելու փոխարեն գետն են գցել: Մեկ ուրիշ տարբերակով` օձը անտառում է եղել, ձնհալի ջրերը բերել ու հասցրել են գետ։ Մի քանիսն էլ բացառեցին ձկների կամ թռչունների գործը, որովհետև «որովայնը խնամքով էր պատռված, մաշկն էլ մեծ զգուշությամբ` հանված»:
Բնապահպանության պետական տեսչության Սյունիքի մարզային բաժնի աշխատակիցների գալուց հետո միայն ճշտվեց ու կասկածները մարդկանց փարատվեցին: Նրանք նշեցին, որ այս հայտնաբերվածը վիշապօձ է: «Նկարները ուղարկեցինք կենդանագետներին, եւ պատասխանը ստացել ենք, վիշապօձ է, վագրային պիթոնի տեսակ։ Այն Հայկական լեռնաշխարհում չի հանդիպում, եւ զարմանալի է, թե ինչպես է հայտնվել գետում»,- ասում է բնապահպանության պետական տեսչության Սյունիքի մարզային բաժնի տեսուչ Վահրամ Մարտիրոսյանը։ Սողունի մարմնից փչող գարշահոտությունից բնապահպանները ենթադրեցին, որ եթե սառը ջրում մնալուց էլ արդեն հոտ է գալիս, ապա մեկ ամսից ավելի է, ինչ կենդանին սատկել է։ Վահրամ Մարտիրոսյանի խոսքով, իրենք այս առիթով որոշ ճշտումներ կանեն, բայց դա հիմնականում իրենց գործառույթների մեջ չի մտնում: Վերջինս դժվարացավ ասել նաև, թե ով է իրավասու զբաղվելու հարցով:
Մեկնաբանել