«Ժառանգություն» կուսակցությունը վերջերս կոչ էր արել Հայաստանի Հանրապետական, «Բարգավաճ Հայաստան», «Օրինաց Երկիր», Հայ հեղափոխական դաշնակցություն կուսակցություններին եւ Հայ ազգային կոնգրեսին ձեւավորել նոր, քաղաքական ոչ-ֆորմալ կենտրոն` Կլոր սեղանի ձեւաչափով: Այստեղ պետք է ընդգրկվեին 3 ընդդիմադիր եւ 3 կոալիցիոն ուժերը, ինչի շնորհիվ համամասնորեն ներկայացված կլինեին ընդդիմությունն ու իշխանությունը: Ինչպես «Հետքին» փոխանցեց «Ժառանգություն» կուսակցության մամլո քարտուղար Հովսեփ Խուրշուդյանը, իրենք առայժմ որևէ պաշտոնական պատասխան չեն ստացել: «Մենք առաջարկի վերջում կոչ էինք արել մինչև ապրիլի 9-ը պատասխանել, բայց փաստորեն որևէ պաշտոնական պատասխան դեռ չենք ստացել: Եղել են առանձին քաղաքական գործիչներից մեկնաբանություներ, հայտարաություններ: Դրանք մենք որոշ մասով կընդունենք իբրև պաշտոնական կարծիք այն դեպքում, եթե տվյալ քաղաքական ուժերի կողմից պաշտոնական տեսակետ մինչև ամսի 9-ը ի հայտ չգա»,- ասաց նա: Խոսելով առաջարկից ունեցած իրենց ակնկալիքների մասին` Հ. Խուրշուդյանը նշեց, որ իրենք կարծում են, որ խնդիրն այնքան լուրջ է, որ մտահոգությունը պետք է բոլորինը լիներ` և ոչ միայն «Ժառանգությանը»: «Հասարակությունը ևս մտահոգվսծ է: Կան ինչպես արտաքին սպառնալիքներ և մարտահրավերներ, այնպես էլ ներքին: Այն, որ մինչև հիմա պաշտոնական պատասխան չի եղել, մեզ լուրջ մտորելու տեղիք է տալիս: Բայց մենք առայժմ զերծ կմնանք մենկաբանություններից և կսպասենք ամսի 9-ին: Դրանից հետո մենք նաև պաշտոնապես կարձագանքենք այս փաստին»,- ասաց նա: