Բոլոր ցուցանիշերն աճել են
Հայաստանի բանկերի միության նախագահ Արարատ Ղուկասյանն այսօր «Նովոստի» մամուլի կենտրոնում, ամփոփելով բանկային համակարգի գործունեության այս տարվա առաջին եռամսյակը, նշեց, որ բոլոր ցուցանիշերի առումով բանկային համակարգը աճ է գրանցել:
«Ակտիվների մասով աճը կազմել է 5, 36 տոկոս կամ 72 միլիարդ դրամ: Վարկային ներդրումների առումով նույնպես աճ կա` 7.42 տոկոս կամ 54 միլիարդ` դրամով: Վարկային բյուրոյի տվյալների ուսումնասիրությամբ` առաջին եռամսյակի ընթացքում բանկային համակարգի կողմից տրամադրվել են ավելի քան 150 000 վարկեր, որոնց գերակշռող մասը սպառողական տիպի վարկեր են»:
Ժամկետանց վարկերի կշիռն էլ է նվազել. Ա. Ղուկասյանի խոսքով` անցած տարվա ավարտին կային գնահատականներ, որ ժամկետանց վարկերը կազմում են ընդհանուր պորտֆելի 8-10 տոկոսը, իսկ այս տարվա առաջին եռամսյակի ավարտին այդ գնահատականը 5 տոկոս է:
«Դրական աճ կա նաև ընդհանուր կապիտալի առումով. այն կազմել է մոտ 3 տոկոս` համեմատած անցած եռամսյակի ավարտի հետ: Առաջին եռամսյակի ավարտին բանկային շահույթը կազմել է 6.7 միլիարդ, որը զգալիորեն գերազանցում է անցյալ տարվա առաջին եռամսյակի շահույթը»,- ասաց նա` նշելով, որ առաջին եռամսյակն իրենք հաջող ցուցանիշներով են փակում:
Ավանդների և վարկային տոկոսադրույքները, համեմատած 2009-ի հետ, նվազել են, ինչը, Ա. Ղուկասյանի գնահատմամբ` նույնպես ազդելու է տնտեսական աշխուժացման բարձրացման վրա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել