Մարդու իրավունքների պաշտպանը իրավասու չէ զբաղվել Կալկաթայում Հայոց մարդասիրական ճեմարանի սաների բողոքներով: «Հետքը» դիմել էր ՀՀ մարդու իրավունքների պաշտպան Արմեն Հարությունյանի գրասենյակ` պարզաբանում ստանալու, թե Ճեմարանում առաջացած խնդրի դեպքում կարո՞ղ է ՄԻ պաշտպանը որևէ կերպ միջամտել: ՄԻ պաշտպանի գրասենյակի տեղեկատվության և հասարակայնության հետ կապերի բաժնից պատասխանեցին, որ օմբուդսմենը չի կարող զբաղվել այդ հարցով, քանզի, ըստ Սահմանադրության, եկեղեցին պետական մարմին չէ, իսկ ՄԻ պաշտպանի իրավասությունների մեջ չի մտնում միջամտություն ցուցաբերել այն կառույցներում, որոնք պետական մարմին չեն համարվում: Մեր հարցին, թե արդյոք ՄԻ պաշտպանն իրավասու չէ միջամտել և անդրադառնալ ուսանողների բողոքներին` որպես ՀՀ քաղաքացիների, աշխատակիցը պատասխանեց. «Պաշտպանը նման լիազորություն չունի: Եթե նույնիսկ երեխաներն էլ դիմեին նրան, ինքը առավելագույն դեպքում կարող է կաթողիկոսին խնդրանքով դիմել, բայց միջամտել չի կարող»: