Հոկտեմբերի 11-ին «Մոսկվա» կինոթատրոնում կմեկնարկի «Կինոաշունը»
Ազգային կինոյի ամսվա շրջանակներում «Մոսկվա» կինոթատրոնում կկազմակերպվի ֆոտոցուցահանդես` նվիրված հայ կինոյի պատմությանը: Ցուցահանդեսի համար վերականգնվել են 120-ից ավելի հին լուսանկարներ, որոնք ընդգրկում են հայկական կինոյի պատմությունը 20-ական թվականներից մինչև այսօր:
«Կինոաշուն» ծրագրի շրջանակներում հայտարարվելու է ժամանակակից ֆիլմերի գրախոսականների մրցույթ: Լավագույն գրախոսականների համար սահմանված են դրամական պարգևներ: Մրցութային հանձնաժողովի նախագահն է Դավիթ Մուրադյանը, անդամներն են` Սուրեն Հասմիկյանը, Նունե Հախվերդյանը, Անիտա Երզնկյանը, Րաֆֆի Մովսիսյանը: Նյութերը անհրաժեշտ է ուղարկել [email protected] էլ. հասցեով:
Նոյեմբերի 2-ին «Մոսկվա» կինոթատրոնում կանցկացվի նաև սեմինար «Կոդակ» ընկերության մասնագետների կողմից: Կինոյի տանը հոկտեմբերի 20-ին և նոյեմբերի 1-ին կանցկացվի երկու կլոր սեղան-քննարկումներ` նվիրված արդի կինոյի խնդիրներին, «Մեր ժամանակի հերոսը` ժամանակի խնդիր» և «Կինոդրամատուրգիայի արդի խնդիրները» թեմաներով:
Ազգային կինոյի ամսվա շրջանակներում ցուցադրություններ կիրականացվեն «Մոսկվա» կինոթատրոնում, Երևանի Հովհ. Թումանյանի անվան պետական տիկնիկային թատրոնում, «Առնո Բաբաջանյան» համերգասրահում, Նարեկացի արվեստի կենտրոնում: Իսկ Կասկադում և Սիրահարների այգում կկազմակերպվեն բացօթյա ցուցադրություններ:
Այս տարի ցուցադրություններ կկազմակերպվեն Գեղարքունիքի, Շիրակի, Կոտայքի և Արմավիրի մարզերում:
Յուրաքանչյուր ցուցադրավայրի համար կազմված է առանձին ծրագիր: Ծրագրում ընդգրկված ֆիլմերի ցուցադրությունները չեն կրկնվելու: Ամբողջ ամսվա ցուցադրությունների համար ընդհանուր առմամբ ընտրվել է 100 ֆիլմ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել