Հերթական տեխնիկական խափանումը Ազգային ժողովում Այսօր մեկնարկեց Ազգային ժողովի քառօրյան: Այս նստաշրջանին պատգամավորներն իրենց քվեարկության համակարգերն առաջին անգամ միացրին անհատական քարտերի միջոցով: Օրենսդիրներից շատերը, սակայն, պատրաստ չէին քարտային համակարգով քվեարկելուն: Շատերը չէին կարողանում քարտերը տեղադրել և միացնել համակարգը, այդ պատճառով նիստերի դահլիճում խուճապ սկսվեց: Պատգամավորները սկսեցին սեղմել մոնիտորի վրա գտնվող բոլոր կոճակները: ԱԺ նախագահ Հովիկ Աբրահամյանը ստիպված մի քանի անգամ զգուշացրեց պատգամավորների, որ «իրար չխառնվեն»: «Հարգելի պատգամավորներ, կոճակները մի սեղմեք, համբերեք. քարտուղարության աշխատողները կմոտենան ձեզ»,- հորդորում էր ԱԺ նախագահը: Պատգամավորներն անհամբեր էին, արդյունքում քվեարկության համակարգը խափանվեց: Մոտ 20 րոպե ջանք գործադրելուց հետո նիստը հետաձգվեց 20 րոպեով: Արդեն միջանցքում ՀՀԿ խմբակցության պատգամավոր Համլետ Հարությունյանն իր գործընկերներին պատմում էր, որ ինքն ուշացած է ներս մտել և «ապշել» դահլիճում տիրող իրավիճակից: «Այ մարդ, 100 մարդ նստած է, մեկը չկար շուտ ֆայմեր, որ ընդմիջում շուտ անեին: Էս ինչ մարդիկ են»,- ասում էր Հ. Հարությունյանը: Նշենք, որ այս քառօրյային բավարարվել էին նախորդ քառօրյայի ժամանակ լրագրողների բարձրացրած դժգոհությունները: Սարքին էր օդափոխության համակարգը, լրագրողներին հատկացվել է 4 համակարգիչ, ինչպես նաև լուծվել էր ձայնագրությունների խնդիրը: