Այսօրվա ասուլիսին ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը պարզաբանումներ տվեց նախորդ երեքշաբթի ԱԺ-ում հնչեցրած Սպարտակ Մելիքյանի հայտարարյության վերաբերյալ: Հիշեցնենք, որ ՀՀԿ խմբակցության պատգամավոր Սպարտակ Մելիքյանը Ազգային ժողովում հայտարարել էր, որ Վերահսկիչ պալատը «Անանիա Շիրակացի» համալսարանում ստուգումներ է իրականացրել, եւ ստուգող խմբի ղեկավարը համալսարանից պահանջել է 4000 դոլար կաշառք` համալսարանին «սեւ ցուցակում» չընդգրկելու համար: Վերահսկիչ պալատի նախագահ Իշխան Զաքարյանը հայտարարել էր, որ դատի է տվել ՀՀԿ խմբակցության անդամ, պատգամավոր Սպարտակ Մելիքյանին: Դրան հետեւել էին մամուլի հրապարակումներ այն մասին, որ պատգամավոր Արտակ Դավթյանը օգնության է հասել Սպարտակ Մելիքյանին: «Պատգամավորը օգնության կարիք չի զգում, առավել եւս, երբ պատգամավորը Հանրապետական խմբակցությունն է ներկայացնում, ինչը նաեւ ապացուցվեց  պատգամավորի հերթական գործողություններով եւ հայտարարություններով: Ինձ համար` որպես պատգամավորի, որպես մարդու, անընդունելի եւ մերժելի է  անձնական բնույթի ցանկացած քննարկում բարձրացնել քաղաքական ամբիոնի մակարդակի, եւ այդ հարթակն օգտագործել նմանատիպ հարցերի պարզաբանման համար»,- ասաց Արտակ Դավթյանը: Ինչ վերաբերում է հրապարակումներին, որ Սպարտակ Մելիքյանին օգնության է հասել «ԱԺ նախագահի հովանու ներքո» գտնվող մեկ այլ պատգամավոր` Արտակ Դավթյանը, ապա նա ասաց. «Եվ ԱԺ նախագահը, եւ ես, եւ Հանրապետականի բոլոր պաշտոնյանները, որոնք զբաղեցնում են պետական բարձր պաշտոններ, Հանրապետականի բազմահազարանոց ընտանիքի անդամներ ենք, որի նախագահը Սերժ Սարգսյանն է: Մենք պաշտոնավարում ենք այնքան ժամանակ, քանի դեռ ունենք հանրապետության նախագահի վստահությունը»: Նա իր վերաբերմունքը չարտահայտեց Վերահսկիչ պալատի մասին` նշելով, որ դա արդեն ասել է քվերակության ժամանակ: