Ամիսներ առաջ Կառավարության նիստում Քաղաքացիական ծառայության խորհրդի նախագահ Մանվել Բադալյանը դիմեց վարչապետին` աշխատակազմերի կուսակցականցման, աշխատանքի տեղավորման ժամանակ տարբեր միջամտությունների վերաբերյալ: Մանվել Բադալյանի խոսքերով` վարչապետին իր դիմումն արդյունք տվել է: «Մեր քաղաքական չկայացած համակարգի պայմաններում այսքան կուսակցություններ ունենալը, ամեն ինչին կուսակցական պրիզմայով նայելը չի բխում ոչ միայն քաղաքացիական ծառայության, այլև պետական կառավարման համակարգի շահերից և դրա արդյունավետ կազմակերպման հրամայականից: Այո, միջամտությունները նվազել են»,- այսօրվա մամուլի ասուլիսին ասաց Մանվել Բադալյանը: Նրա խոսքերով` հայաստանյան կուսակցությունները դառնում են աշխատանքի բորսաներ: «Մեր համակարգի զարգացման գործում այդ երևությը խոչընդոտող գործոն է»,- ասում է բանախոսը: Մատնացույց անելով քաղաքակիրթ երկրների փորձը` Մանվել Բադալյանը նշում է, որ ընդունված է քաղաքացիական, պետական ծառայությունը զերծ պահել քաղաքականությունից ու կուսակցականությունից: Նա չի ընդունում, երբ մարդիկ ստիպողաբար կուսակցական են դառնում: Նոյեմբերի 4-ին Կառավարության նիստում վարչապետի ելույթից հետո մի շարք նախարարություններում պաշտոնից ազատվեցին աշխատակազմերի ղեկավարներ: Մանվել Բադալյանի խոսքերով` նրանք ոչ թե ազատվել են, այլ պարզապես նրանց պաշտոնավարման ժամկետները չեն երկարաձգվել: «Վարչապետի ձևակերպումը ընդամենը նշանակում է` օրենքով սահմանված կարգով սկսել ընթացակարգ: Վարչապետը օրենքով չի կարող ասել` ազատել աշխատանքից: Վարչապետ, որևէ քաղաքական գործիչ, ղեկավար Քաղաքացիական ծառայության խորհրդում հրահանգներ տալու իրավունքներ չունեն: Բայց երբ վարչապետը Կառավարության նիստում խոսք է ասում, չես կարող անտարբեր լինել, որովհետև պաշտոնյա լինելուց բացի` նաև քաղաքացի ես»,- ասում է Մանվել Բադալյանը: