Այսօրվա մամուլի ասուլիսին ՀՅԴ Գերագույն մարմնի ներկայացուցիչ, Ազգային ժողովի ՀՅԴ խմբակցության պատգամավոր Արմեն Ռուստամյանն անդրադարձավ երեկ դատարանի կողմից «Հայկական ժամանակ» օրաթերթի դեմ պատգամավորներ Սամվել Ալեքսանյանի, Լևոն Սարգսյանի և Ռուբեն Հայրապետյանի հայցի մասամբ բավարարվելուն:

Ըստ այդմ թերթը պետք է յուրաքանչյուր պատգամավորին վճարի 2 մլն 44 հազ. դրամ: Արմեն Ռուստամյանի խոսքերով` վատ չէ, որ մեզանում խնդիրը իրավական համակարգի միջոցով են լուծում, բայց հարցը մեր դատական համակարգն է, որի մակարդակը ցածր է: «Եթե վերջում պետք է դատարանը որոշի, ապա դատարանը այդ անկախության աստիճանը չունի: Հետևաբար, որոշումն էլ հասարակության կողմից չի ընկալվելու որպես ճշմարիտ որոշում. այստեղ է ամբողջ թերությունը: Մեզ թվում է, թե ամուր պետական կառույցներ ենք ստեղծել, բայց եթե այդ պետական կառույցները չունեն հասարակական վստահություն, աջակցություն, ոչինչ չարժեն»,- ասում է ՀՅԴ Գերագույն մարմնի ներկայացուցիչը:

Նրա խոսքերով` այժմ լայն հնարավորություն կա դիմելու Եվրադատարան, և արդեն պրակիտիկայում Եվրադատարանը բազմաթիվ որոշումներ է ընդունել: Սակայն Արմեն Ռուստամյանին աբսուրդ է թվում այն, որ ինչ-որ դատավորի սխալի պատճառով Հայաստանը տուգանվում է, այսինքն` «Հայաստանը պարտակում է տվյալ դատավորին, իսկ այդ դեպքում պետք է այդ դատավորը տույժի ենթարկվի, պետք է նրան անմիջապես ազատել աշխատանքից»:

Եվրախորհրդում Հայաստանն արդեն ընդգրկվել է Եվրադատարանի վճիռները չկատարող երկրների ցանկում: Լրագրողները Արմեն Ռուստամյանին խնդրեցին մեկնաբանել, թե «Հայկական ժամանակ» օրաթերթի դեմ երեկ կայացված որոշումն արդյոք կապված չէ՞ նրա հետ, որ իշխանությունները ցանկանում են նախընտրական տարում սնանկ տեսնել մի քանի թերթի:

«Թերթերն էլ պետք է այնպիսի բաներ տպեն, որոնց համար պատասխան տան: Մենք ունենք բազմաթիվ թերթեր, որոնք ստանում են տարբեր պատվերներ այս կամ այն անձին վարկաբեկելու, այս կամ այն լուրը տպելու համար»,- պատասխանեց Արմեն Ռուստամյանը: