Չարենցավանի քաղաքապետարանի ֆֆինանսական եւ տնտեսական վերլուծության բաժնի պետ, քաղաքապետարանին կից աճուրդային հանձնաժողովի աճուրդավար Ալեքսանդր Սահակյանն ասում է, որ Չարենցավանում տեղի ունեցող աճուրդների նկատմամբ մեծ հետաքրքրություն է ցուցաբերում ոչ միայն Չարենցավանի, այլեւ հանրապետության մյուս մարզերի բնակչությունը:

1997-ից աճուրդավարի փորձ ունեցող Ալեքսանդր Սահակյանն ակնհայտորեն լավ է տիրապետում իր գործին, բայց դժվար է միանշանակ պարզել, թե Չարենցավանում իրականացվող աճուրդների նկատմամբ նրա նկարագրած հետաքրքրության աստիճանը որքան մեծ է: 

Հունիսի 16-ին Չարենցավանի քաղաքապետարանում միանգամից 4 հողատարածքների եւ մեկ նկուղային տարածքի (Չարենցավանի 7-րդ թաղամասի 13-րդ շենքի 2/1 շինարարության բացվածքի) աճուրդ էր անցկացվում: Հասարակական կառուցապատման նպատակով քաղաքապետարանի ավագանու որոշմամբ աճուրդի հանված հողակտորների եւ նկուղային հատվածի համար աճուրդը կայացավ բավական արագ: Մոտ 10 անդամներից բաղկացած աճուրդային հանձնաժողովը, աճուրդավար Ալեքսանդր Սահակյանի ղեկավարությամբ, մոտ 20 րոպեում կարողացավ իրականացնել աճուրդը, որոնցից յուրաքանչյուրի համար 2-ական հայտ էին ներկայացրել: Քանի որ աճուրդը ենթադրում է մրցակցություն, հավանաբար այդ պատճառով էլ ապահովվել էր երկրորդ անձի մասնակցությունը:

Դասական աճուրդային եղանակով 4 հողերի ու նկուղային տարածքի օտարումը կայացավ 2 քայլով, մեկ քայլի չափը` 5 տոկոս, 1քմ տարածքի կադաստրային մեկնարկային արժեքը` 2940 դրամ: Բոլոր 5 աճուրդներն էլ կայացան 2 քայլով, մինչդեռ աճուրդը սկսելուց առաջ Ալեքսանդր Սահակյանը հույս ուներ, որ քայլերն ավելի շատ կլինեն: «Աճուրդ է եղել` մինչեւ 55 քայլի հասել ենք»,-հպարտությամբ ասաց նա: Բազմաթիվ քայլերով աճուրդ իրականացնելու նրա ցանկությունը կիսում էին նաեւ աճուրդային հանձնաժողովի անդամները, որոնցից մեկն անգամ ասաց. «Ինչքան շատ քայլ լինի, այնքան լավ մեզ համար, քաղաքապետարանի բյուջեն կհարստանա»: Միգուցե բացարձակ օտար մարդկանց դեպքում աճուրդի քայլերն ավելի շատ լինեին, բայց կոնկրետ այս պարագայում դրանք սահմանափակվեցին 2-ով:

Պարզորոշ երեւում էր, որ յուրաքանչյուր աճուրդի մասնակից 2 անձանցից մեկին քաղաքապետարանի աճուրդային հանձնաժողովի անդամները ճանաչում էին: Նրանք միմյանց դիմում էին անունով կամ ազգանունով, խոսում շատ մտերմիկ տոնով: Աճուրդի մի քանի մասնակիցներ կարգը լավ չիմանալու կամ լավ չըմբռնելու պատճառով իրենց տոմսակները մի քանի անգամ բարձրացրին` արդյունքում իրենց նախանշած արժեքից ավելի բարձր գին վճարելով ձեռք բերվող հողակտորի համար:

Մեր դիտարկմանն ի պատասխան, թե մարդիկ ծանոթ չէին աճուրդի կարգին եւ ստիպված եղան ավելին վճարել, Ալեքսանդր Սահակյանն ասաց, թե հայտը ներկայացնելիս իրենք բացատրել են աճուրդի կարգը: Այն ներկայացվեց նաեւ աճուրդը սկսելուց առաջ, սակայն մասնակիցներն այդպես էլ չըմբռնեցին կարգը: Աճուրդի ավարտից հետո նրանցից երկուսը քաղաքապետարանի միջանցքում շփոթված ասում էին, թե իրենք չգիտեին, որ գումարն այդքան կկազմեր:

Անցկացվող աճուրդի մասին քաղաքապետարանը հայտարարություն էր հրապարակել «Հայաստանի Հանրապետություն» օրաթերթում, բայց արդյո՞ք այդ մասին բնակչությանը տեղեկացրել էին, աճուրդավար Ա. Սահակյանը տեղյակ չէր: «Դրանով զբաղվում է մեր մամուլի քարտուղարը, որն այս պահին երկրում չէ, ու չգիտեմ` քաղաքում ցուցանակներին աճուրդի մասին տեղեկություն փակցրե՞լ է, թե՞ ոչ: Չնայած` օրենքով մենք պարտավոր չենք դա անել, քանի որ մինչեւ 3000 տպաքանակ ունեցող թերթում մեկ ամիս առաջ հայտարարություն ենք տվել»,- ասաց նա:

Քաղաքի հրապարակում տեղադրված տեղեկատվական ցուցանակին, ինչպես նաեւ քաղաքապետարանի հայտարարությունների համար նախատեսված ցուցանակին աճուրդի մասին որեւէ տեղեկության մենք չհանդիպեցինք: Սակայն, դրական մի քանի երեւույթներ նկատեցինք: Չարենցավանի քաղաքապետարանի հայտարարությունների ցուցանակին, ինչպես հենց հրապարակում տեղադրված ցուցանակներին, փակցված էին քաղաքապետարանի ավագանու որոշումները, տեղեկություններ բյուջեի կատարողականի, գույքի պարտքի մասին: Սա, իսկապես, հետաքրքրական էր, որովհետեւ համայնքի աշխատանքների մասին հաշվետվություններն ու կատարողականները լավագույն դեպքում փակցվում են համայնքապետարաններում:

Շուրջ երկու տարի է Չարենցավանի քաղաքապետարանի առաջին հարկում` քաղաքացիների ընդունելության բաժնում, տեղադրված է սենսորային համակարգիչ, որից ցանկացողները կարող են անվճար օգտվել:

Համակարգչի միջոցով կարելի է ծանոթանալ քաղաքապետարանի բյուջեին, ավագանու որոշումներին, տեղական ինքնակառավարմանը վերաբերող տեղեկություններին:

Քաղաքապետարանի ընդունելության բաժնի աշխատակից Անահիտ Վարդանյանն ասում է, որ համակարգչով հետաքրքրվողները շատ չեն, բայց լինում են: