Ասիական զարգացման բանկը Հայաստանի համար ցածր տնտեսական աճ է կանխատեսում
Ասիական զարգացման բանկը ապրիլի 1-ին հրապարակել է ասիական տարածաշրջանի երկրների տնտեսական աճի կանխատեսումները առաջիկա երկու տարվա համար: Հայաստանի համար ԱԶԲ-ն 2014 թ. կանխատեսել է 4.6% տնտեսական աճ, իսկ 2015 թ.՝ 5%:
Հայաստանի վերաբերյալ կանխատեսումները զիջում են ոչ միայն ՀՀ կառավարության սպասումներին, այլև ցածր են մեր տարածաշրջանի մյուս երկրների ցուցանիշներից: Այսպես՝ ՀՀ պետական բյուջեում 2014 թ. համար հիմք է ընդունվել ՀՆԱ-ի 5.2% աճը:
ԱԶԲ-ն Ադրբեջանի համար 2014 թ. կախատեսել է 5%, Վրաստանի՝ համար՝ 5.5% աճ: Ասիական տարածաշրջանի համար միջին աճը կանխատեսվել է 6.2%:
Հայաստանի վերաբերյալ կանխատեսումները հաշվի չեն առնում ոչ ուկրաինական ճգնաժամից եկող ռիսկերը, ոչ էլ վերջին ցրտահարությունը:
ԱԶԲ տնտեսագետ Գրիգոր Գյուրջյանը «Հետք»-ի հարցին ի պատասխան ասաց, որ դժվարանում են գնահատել, թե Մաքսային միությանն անդամակցությունը կարճաժամկետ հեռանկարում դրական, թե բացասական ազդեցություն կունենա Հայաստանի վրա: Որպես դրական ազդեցություն` նշվեց ներդրումների հոսքը Ռուսաստանից, մարդկանց ազատ տեղաշարժվելու իրավունքը, իսկ որպես բացասական ազդեցություն՝ մաքսատուրքերի բարձրացումը: Սակայն, ըստ Գ. Գյուրջյանի, երկարաժամկետ կտրվածքով օգուտները կգերազանցեն վնասներին:
ԱԶԲ գնահատականներով՝ առաջիկա տարիներին ՀՀ կառավարությունը կշարունակի բիզնես միջավայրի բարեփոխումները, կաջակցի արտահանմանը, հանրային հատվածում աշխատավարձերը կբարձրանան, պետական պարտքը կկայունանա, իսկ դրամավարկային քաղաքականությունը միտված կլինի տնտեսական ակտիվության խթանմանը: Սակայն նման լավատեսական հեռանկարների պարագայում անգամ կանխատեսվել է տնտեսական աճի համեմատաբար ցածր տեմպ:
Նշենք, որ ԱԶԲ-ն Հայաստանում ֆինանսավորում է Հյուսիս-Հարավ ճանապարհային միջանցքի շինարարությունը: Առաջին վարկային գիծը կազմել է 60 մլն դոլար, ինչը թույլ է տվել սկսել աշխատանքները: Հաստատվել է նաև երկրորդ վարկային գիծը՝ 170 մլն դոլարի չափով, այն կհատկացվի 2014 թ.: Բացի այդ, սկսած 2005 թվականից ԱԶԲ-ն Հայաստանում 133 մլն դոլար արժողությամբ ծրագրեր է իրականացրել մասնավոր սեկտորի հետ:
Մասնավորապես՝ ԱԶԲ-ն վարկավորում է Արփա-Սևան թունելի շինարարությունը, ու այդ նպատակով 2013 թ. հատկացրել է 25 մլն դոլար: Բանկը նաև վարկային ռեսուրսներ է տրամադրել 4 առևտրային բանկերի, մասնակցել է «Զվարթնոց» օդանավակայանի երկրորդ տերմինալի շինարարության ֆինանսավորմանը, համատեղ ծրագրեր է իրականացրել նաև Վերակառուցման և զարգացմաան եվրոպական բանկի հետ:
Մեկնաբանել