Արմեն Ռուստամյան. «Իշխանությունները ՀՅԴ առաջ դուռը բաց են թողել»
Այսօր ՀՅԴ գրասենյակում լրագրողների հետ հանդիպման ժամանակ խմբակցության ղեկավար Արմեն Ռուստամյանն ասաց, թե իրենց քաղաքական ուղեգիծը հստակ է` իրենք մնում են ընդդիմություն: «Եղել են թերություններ, պրոբլեմներ, բայց ԳԺ-ի ժամանակ վերահաստատվել է ՀՅԴ վարվող քաղաքականությունը»,- ասաց նա: Հայ Յեղափոխական Դաշնակցություն կուսակցությունը ապրիլի 18-ից 20-նն անցկացվող Գերագույն ժողովի ժամանակ որոշել է մաս չկազմել իշխող կոալիցիային:
Ա. Ռուստամյանի խոսքով` իրենց 7 կետանոց առաջարկությունների փաթեթն ընդունելու արդյունքում են իրենք որոշելու` ում հետ, ինչպես համագործակցել, և քանի որ իշխանությունները մերժել են փաթեթն ամբողջապես ընդունելու` ՀՅԴ պահանջը, իրենք որոշել են կառավարությունում չստանձնել ամբողջական պատասխանատվություն:
«Մենք չունեինք այն ամբողջական երաշխիքը, որ այդ 7 կետերն ընդունվում են ու պետք է իրականացվեն, որովհետև մի բան է ընդունելը, մի բան է` ժամանակացույցի բերելը, դրանով առաջնորդվելը: Սա տեղի չի ունեցել, ըստ էության, բայց իշխանությունները դուռը բաց են թողել, ասում են, թե այդ 7 կետերին մենք անդրադառնալու ենք: Չունենք ամբողջական պատկերացում, թե ո՞ր չափով այդ 7 կետերը կընդունվեն, բայց կրկնում եմ` եթե դրանք լիարժեք ընդունվեին, ապա մենք պատրաստ էինք ստանձնել ամբողջական պատասխանատվություն և իրականացնել այդ 7 կետերը»,- նշեց նա:
Ռուստամյանը հիշեցրեց, որ նախկինում ՀՅԴ-ն դուրս եկավ կոալիցիայից 7 կետանոց ծրագրից միայն մեկի` հայ-թուրքական արձանագրությունների վերաբերյալ առարկություններ ունենալու պատճառով: «Մենք ինքնանպատակ չենք մտնում կոալիցիա, եթե ուղեգիծը չի ընդունվում, մտնում ես` որ ի՞նչ անես, դու պետք է ընթացք տեսնես, որ ջանքերիդ շնորհիվ տեմպն ավելացնես: Դրա համար այս պահին ասում ենք` մնում ենք ընդդիմադիր դաշտում և շարունակում ենք պահանջել 7 կետերի իրականացում: Եթե վաղը տեսնենք, որ նույն կառավարությունը չի ասում, բայց սկսում է իրականացնել այդ կետերը, որովհետև մեզ համար կարևորը այն չէ, որ միայն հայտարարեն, մեզ պետք են երաշխիքներ, որ դրանք կիրականացվեն»,- նշեց պատգամավորը:
Հարցին`եթե կառավարությունը ընդունի 7 կետերը, ՀՅԴ-ն կվերանայի՞ իր դիրքորոշումը և մաս կկազմի՞ կոալիցիային, Արմեն Ռուստամյանը պատասխանեց, թե իրենք միշտ խոսել են այդ մասին շատ հստակ` նշելով, թե իրենք կողմ են ամբողջական համակարգային իշխանափոխությանը:
Մեկնաբանել