Հայաստանում Ռուսաստանի Դաշնության դեսպան Իվան Վոլինկինը որևէ արտառոց կամ կրիմինալ տարր չի տեսնում ՌԴ քայլի մեջ՝ զենք վաճառել Ադրբեջանին:

Հիշեցնենք, որ Հայաստանի ռազմավարական գործընկեր Ռուսաստանը շարունակում է սպառազինել հակառակորդ Ադրբեջանին: Ղարաբաղաադրբեջանական հակամարտ զորքերի շփման գծում մայիսի 21-ի, լույս 22-ի գիշերը տեղի ունեցած միջադեպից հետո ադրբեջնական կողմը երեք վիրավոր էր տվել: Հենց հաջորդ օրը լրատվամիջոցները հերթական տեղեկությունները տարածեցին, որ Ռուսաստանը Բաքվին 100 Т-90С տանկ է մատակարարել: 

«Հետքի» հետ զրույցում, պատասխանելով այն հարցին, թե արդյոք բարեկամ Ռուսաստանը ճիշտ է վարվում, երբ այս անգամ էլ տանկ է վաճառում Ադրբեջանին, Ի. Վոլինկինը պատասխանեց. «Դա կոմերցիոն հարց է, քաղաքականություն այստեղ չկա: Եվ պետք չէ այդ հարցերի վրա ուշադրություն սևեռել: Այնպես որ… Ես այստեղ կրիմինալ չեմ տեսնում, վտանգավոր որևէ բան չի կատարվում, դա պարզապես կոմերցիոն գործարք էր, Հայաստանի հետ էլ մեզ կապում են ռազմատեխնիկական հարաբերությունները, զենքի վաճառք կրկին այս դեպքում էլ կա, այնպես որ որևէ արտառոց բան չկա»:

Մեր դիտարկմանը, թե Հայաստանին Ռուսաստանն այդ ծավալով զենք չի վաճառում, դեսպանը հակադարձեց՝ նշելով. «Մաշտաբների մասին եկեք չխոսենք: Ես կարող եմ ասել միայն, ծավալը բավարար է ու լավը»: