ԱԺ ԲՀԿ խմբակցության քարտուղար Նաիրա Զոհրաբյանը կառավարության 2013թ. հաշվետվության խորհրդարանական քննարկման ժամանակ խոսեց «Հազարամյակի մարտահրավերներ կորպորցիայի» հովանավորությամբ Հայաստանում իրականացված հնգամյա դրամաշնորհային ծրագրի մասին, որի շրջանակներում շուրջ 50 հազար ֆերմերների համար 2007-2011թթ. կազմակերպվել է «Ջրից դեպի շուկա» դասընթացը: Ծրագրի բյուջեից 16,6 միլիոն դոլար է ծախսվել այդ դասընթացի վրա:

«Ամերիկյան խիստ հավաստի աղբյուրների համաձայն, «Հազարամյակի մարտահրավերները» դադարեցվել են` հիմք ունենալով 16,6 մլն դոլարի «լոլոն» գյուղացիական տնտեսությունների գլխին կարդալու համար»,- նշեց Զոհրաբյանը:

Անդրադառնալով նախորդ՝ Տիգրան Սարգսյանի կառավարության հաշվետվությանը` ԲՀԿ քարտուղարն ասաց, որ տպավորությունն այնպիսին է, թե մենք ապրում ենք բացարձակապես տարբեր իրականություններում: 

«Եթե ամեն ինչ լավ է, բոլոր ցուցանիշները կատարվել են, բյուջեն կատարվել է, բա ի՞նչ եղավ: Այստեղ ակամայից հիշում ես հայտնի անեկդոտը. բա որ բոլորդ սուրբ եք, եկեղեցու խաչն ո՞վ գողացավ: Տպավորությունն այնպիսին է, որ մի վիրտուալ աշխարհ եք ստեղծել ձեզ համար և ընդամենը հրապարակում եք թվեր, որոնց տակ դատարկություն է` սնամեջ տարածք: Եթե ամեն ինչ այդքան լավ է, ապա ինչո՞ւ հնարավոր չեղավ ապահովել նախատեսված տնտեսական աճը: Եթե ամեն ինչ այդքան լավ է, բոլոր ցուցանիշները կատարվել են, ապա ինչո՞ւ է Հայաստանը ներդրումների պակասի առումով աշխարհի ամենառիսկային պետություններից մեկը, որ որևէ մեկը անգամ չի համաձակվում ցուցաբերել կամիկաձեություն ու ներդրում անել: Եթե ամեն ինչ այդքան լավ է, ապա ինչո՞ւ է ՀՀ-ն ամենառիսկային պետություններից մեկը արտագաղթի տեմպերով: Գնացեք Վրաստանի սահման ու տեսեք, թե ինչ է կատարվում: Մարդիկ օդային սահմանը հատելու գումար չունենալով` արդեն ոտքով են լքում սեփական երկիրը:

Եթե ամեն ինչ լավ է, ապա ինչո՞ւ է ՀՀ քաղաքացին գնում վերջին նվաստացման ու վերցնում ադրբեջանական ազգանուն՝ իր հայրենիքը լքելու համար: Ինչու է գործազրկությունը աճում: Ու պետք չէ կեղծ թվեր ներկայացնել, գործազրկության աճ է իբր գրանցվում: Ե՞րբ պետք է իշխանությունները գոնե մեկ անգամ ունենա քաղաքական համարձակություն` ներկայացնելու ձախողման իրական պատճառները և ոչ թե անընդհատ ասել, որ ամեն ինչ լավ է, ամեն ինչ գերակատարվել է, բայց իրականում մենք կունենանք Հայաստան, որը կապ չունի «ապահով Հայաստանի» ձեր կեղծ իդեայի հետ:  Տիգրան Սարգսյանի կառավարությունը վեց տարի զբաղվել է տնտեսական կանիբալիզմով: Իրականում չի եղել ոչ մի աճ, չի եղել ոչ մի առաջընթաց, մենք կենսական ոլորտներում գրանցել ենք հետընթաց, երկիրն ինքը ներսից իրեն կերել է»,- նշեց Նաիրա Զոհրաբյանը:

ԲՀԿ խմբակցության քարտուղարը հավելեց, որ իրենք դեմ են քվեարկելու տնտեսական «կանիբալիզմի նախահայր Տիգրան Սարգսյանի կառավարության» հաշվետվությանը: