ԱԺ ԲՀԿ խմբակցության պատգամավոր Էլինար Վարդանյանը, ով ոչ իշխանական ուժերի ներկայացուցիչների հետ դուրս եկավ ոստիկանության Կենտրոնի բաժնից, հայտնեց, որ իրենք ոստիկանության հետ ձեռք են բերել պայմանավորվածություն:

«Մենք ոստիկանությունում պայմանավորվեցինք, որ տրամադրելու ենք կատարվածի ողջ նյութերը, փաստերը ու մեր տրամադրած նյութերի հիման վրա ոստիկանությունում կանցկացվի ներքին ծառայողական քննություն: Մենք նաև զգոնության կոչ արեցինք, որպեսզի իրենց գործողություններով ավելորդ լարվածություն չստեղծվի»,- ասաց Է. Վարդանյանը:

ԱԺ ՀԱԿ խմբակցության քարտուղար Արամ Մանուկյանի խոսքով էլ՝ ոստիկանությունը տրամադրված է ակտիվիստ Նարեկ Հակոբյանի նկատմամբ քրեական գործ հարուցել: Նարեկին բոլորի հետ միասին այսօր բերման էին ենթարկել: «Ես դիմեցի ոստիկանապետին, որ ուշադիր նայեն, որովհետև մենք կարծում ենք, որ հիմք չկա քրեական գործ հարուցելու համար: Մենք ասացինք, որ նայեն, որ ավելորդ սրացում չլինի, որ նոր քաղբանտարկյալ չլինի»,- նշեց պատգամավորը՝ հավելելով, որ իրենք չեն տիրապետում ինֆորմացիային, թե ո՞ր հիմքով են մտադրված քրեական գործ հարուցել ակտիվիստի նկատմամբ:

ՀԱԿ պատգամավորն ասաց, որ իրենք խնդրել են՝ որևէ քրեական գործ չհարուցել: «Մենք ասացինք, որ դա կլարի առանց այն էլ լարված իրավիճակը: Այս պահին եվրոպայում նայվում է Հայաստանի ժողովրդավարացման խնդիրները ու ոստիկանությունը, քթի ծակ չունենալով, անխոհեմ քայլեր է անում: 

«Բնականաբար, իրավական խնդիրներն առաջնահերթ են, բայց կա քաղաքական խնդիր՝ Հայաստանը գնում է ժողովրդավարացման ճանապարհո՞վ, թե՞ նոր քաղբանտարկյալ ունենալու: Ու պատճառն էլ էլէտրաէներգիայի դեմ պայքարն է, որ մարդիկ չեն ուզում, որ թանկանա, բա լավ են անում, որ չեն ուզում: Քիչ են անում, պետք է բոլորը դուրս գան փողոց, բոլորը պետք է պայքարեն: Այն, որ երեխեքը ակցիա են անում, լավ են անում...»,- շեշտեց Արամ Մանուկյանը: