Անցյալ շաբաթ Լատինական Ամերիկա կատարած պետական այցի շրջանակներում արգենտինական «La Nation» թերթին տված հարցազրույցում Սերժ Սարգսյանն ասել էր, թե հայ ժողովրդին մտահոգում է ՌԴ կողմից զենքի վաճառքն Ադրբեջանին: Նախագահի այս հայտարարությունը ԱԺ ՀՅԴ խմբակցության անդամ Արծվիկ Մինասյանը համարում է վերջին օրերին հայ-ադրբեջանական շփման գծում տեղի ունեցող իրադարձությունների արդյունք:

«Դա ավելի շուտ կապված է Ադրբեջանի ագրեսիվ պահվածքի, կեցվածքի հետ, ինչի արդյունք է նաև զենքերի գնումը Ռուսաստանից: ՌԴ պաշտոնատար առանձին անձինք հայտարարում են, թե զենքի վաճառքը բիզնես է, բայց այդ բիզնեսը վերածվել է Հայաստանի համար սպառնալիքի, և չխոսել դրա մասին, չբարձրաձայնել, որ կա նման սպառնալիք, չհրավիրել համապատասխան ուշադրություն ու չձեռնարկել քայլեր` սխալ կլիներ»,- նշեց նա:

Մեր հարցին, թե արդյոք Ս. Սարգսյանի արձագանքն ուշացած չէ՞, երբ զենքի վաճառք տարիներ շարունակ տեղի է ունենում, Ա. Մինասյանը դժվարացավ պատասխանել` նշելով, որ չի տիրապետում «Հայաստանի ղեկավարության կողմից տարվող ողջ գործիքակազմին»: «Բայց այն, որ պետք է աշխատել թեկուզ ուշ, բայց ոչ ուշացած ռեժիմով, միանշանակ է: Մենք հնարավորինս պետք է միջազգային հանրության, Ռուսաստանի ուշադրությունը հրավիրենք այդ փաստի վրա, որ, այո, Ադրբեջանի զենքի գնումները արդյունք են ռազմատենչ  կեցվածքի: Հետևաբար, ամեն ինչ պետք է անել` ագրեսիայի դեմն առնելու»,- նշեց նա:

Պատգամավորին հացրինք` ագրեսիայի դեմն առնելու համար բավարա՞ր է միայն արձանագրել այդ փաստը, որևէ դատապարտող հայտարարություն ռուսական իշխանությունների հասցեին չպե՞տք է հնչեցնել: «Բարձրաձայնել ռազմավարական գործընկեր համարվող երկրին «դատապարտում եմ» արտահայտությամբ, այս դեպքում ճիշտ չէ: Հարկավոր է արդյունավետ այլ գործիքներ օգտագործել ավելի մեծ արդյունքների հասնելու համար»,- ասաց Արծվիկ Մինասյանը: