Բնակչության վերարտադրման մի շարք ցուցանիշներով Հայաստանի Հանրապետությունն աշխարհում զբաղեցնում է վերջին տեղը: Այս մասին կառավարության այսօրվա նիստում հայտարարել է Հովիկ Աբրահամյանը` նշելով, որ դա խիստ մտահոգիչ հարց է: 

«Այսօր հատկապես ուզում եմ անդրադառնալ ծնունդների սեռային հարաբերակցությանը: Թե՛ որպես քաղաքացի, թե՛ որպես վարչապետ, թե՛ որպես երկու աղջիկների հպարտ հայր ինձ խիստ անհանգստացնում է այն սոցիալական միջավայրը, որի հետևանքով այսօր մենք կորցնում ենք հազարավոր ապագա մայրեր»,- ասել է Հովիկ Աբրահամյանը` նկատի ունենալով Հայաստանում տղաների համեմատ աղջիկների ծնունդների թվի նկատելի նվազումը վերջին տարիներին:

Նա աշխատանքի և սոցիալական հարցերի և առողջապահության նախարարներին հանձնարարել է մշակել և մինչև 2015 թվականի մարտ ամիսը ներկայացնել իրավիճակը շտկելու համապարփակ ծրագիր: