Մանկուց հաշմանդամություն ունեցող Էմիլի թոշակը վերականգնել են
Արփինե Մինասյան
Ի ծնե թոքային անբավարարությամբ տառապող 12-ամյա էմիլ Վարդանյանի հաշմանդամության թոշակը վերականգնել են: «Հետքը» գրել էր, որ հանձնաժողովը բավարար հիմքեր ունենալով հաշմանդամության կարգ չէր տրամադրել` պատճառաբանելով, որ երեխայի մոտ աճ կա: Էմիլի մոր` Մարինեի խոսքով, երեխան դեղորայքի, բուժումների եւ լավ խնամելու արդյունքում է աճել: Հրապարակումից հետո խնդրով հետաքրքրվեց նաեւ Մարդու իրավունքների պաշտպանի` հաշմանդամություն ունեցող անձանց հարցերով խորհրդականը:
«Երեք կամիսյա անցավ երեխան, վերջինը փետրվարի 13-ին էր, Երեւանում: Վերջապես երեկ Սեւանի հիվանդանոցից պատասխանը վերցրինք: Ժամկետը երկարացրել են մինչեւ 2017թ. եւ Էմիլս արդեն ստանալու է քսանմեկ հազար հինգ հարյուր դրամ թոշակ»,- մեզ հետ հեռախոսազրույցում ասաց Մարինե Սարիբեկյանը:
Վարդանյան ընտանիքն այժմ ստիպված չի լինի հիվանդանոցային բուժման ժամանակ հիվանդասենյակի գումար վճարել: Մարինեի խոսքով` երեխայի թոշակով իրենք ոչ թե հացի, այլ դեղորայքի խնդիր են լուծում:
«Դեղերը մի կերպ ենք հասցնում գնենք, գումարը չի բավականացնում: Եթե գումարով կամ դեղերով օգնողներ լինեն, անչափ ուրախ կլինենք»,- ասում է Մարինեն:
Էմիլին ամեն օր երկու -երեք ժամը մեկ թթվածին են միացնում: Նրա մոտ սեզոնային եւ ամսական սրացումներ են լինում: Էմիլը կապտում է, շունչը կտրվում է, թթվածին են միացնում եւ տեղափոխում Երեւանի հիվանդանոց: Ծնողների խոսքով` բուժումը երեխայի կյանքի որակը բարձրացնելու, ցավերը մեղմացնելու համար են: Էմիլին պիտի դեղորայքով բուժեն մինչեւ 18 տարեկան դառնալը, որից հետո պետք է թոքերի փոխպատվաստում կատարվի, որից եւս տղայի ծնողները հույս չունեն. փոխպատվաստումը կատարվում է արտասահմանում եւ թանկ արժե: Տղայի մոտ հիմա էլ լյարդի, ստամոքսի խնդիր կա: Երկարատեւ բուժումներից հետո թոքերի վիճակը դեռ անկայուն է:
Գեղարքունիքի մարզի Վարսեր գյուղում վարձով ապրող ընտանիքում աշխատում է միայն Էմիլի հայրը` Նորիկը` հաճախ մեկնելով արտագնա աշխատանքի:
Մեկնաբանություններ (1)
Մեկնաբանել