Այս տարվա հունվար-մայիսին Հայաստանում արտադրվել է 298,3 հազ լիտր վիսկի։ Ինչպես տեղեկանում ենք ՀՀ ազգային վիճակագրական ծառայությունից, նախորդ տարվա նույն ժամանակահատվածում Հայաստանում վիսկի չի արտադրվել։

ԱՎԾ-ն վիսկիի արտադրության վերաբերյալ վիճակագրությունը ներկայացնում է այս տարվա հունվարից։ Միայն հունվարին արտադրության ծավալը կազմել է 52,1 հազ. լիտր։

Վիսկիի արտադրությամբ Հայաստանում ներկայում զբաղվում է «Ալեքս Գրիգ» ընկերությունը, որը պատկանում է Ազգային ժողովի պատգամավոր, Հանրապետական խմբակցության անդամ Սամվել Ալեքսանյանին։ «Ալեքս Գրիգը» նախորդ  տարի նոր արտադրամաս է բացել վիսկիի արտադրության նպատակով։ Ավելի վաղ ընկերությունից հայտարարել էին, որ վիսկիի որոշ քանակ որպես փորձանմուշ ուղարկվել է Իրաք։

Վերջերս էլ Սամվել Ալեքսանյանին պատկանող «Երևան Սիթի» սուպերմարկետներում հայտնվել է Mac Alex անվանմամբ վիսկի, որը հենց «Ալեքս Գրիգի» արտադրանքն է։ Այն ներկայացվում է որպես շոտլանդական հումքով պատրաստված բարձրորակ վիսկի։ Ի դեպ, վերջերս համացանցում նաև դրա գովազդն  է տեղադրվել։

Չի բացառվում, որ «Ալեքս Գրիգը» բացի նշվածից, վիսկիի այլ տեսականի ևս վաճառքի հանի «Երևան Սիթի»-ներում։