2015թ. հունվարի 1-ից մեկնարկել էր սրտի անհետաձգելի վիրահատության ծրագիրը, որում ընդգրկվում են այն քաղաքացիները, ովքեր մինչ այդ ներառված չեն եղել սրտի անվճար ինվազիվ վիրահատության իրավունք ունեցող որևէ խմբում։ Այս մասին տեղեկացնում է ՀՀ առողջապահության նախարարությունը:

Հայաստանում լայն տարածում ունեցող սրտանոթային հիվանդությունները մահացության ընդհանուր կառուցվածքում 48 տոկոս են կազմում և ստենտավորումն ինֆարկտի դեպքում մարդու կյանքը փրկելու ամենաարդյունավետ միջոցն է։ Նախարարության վիճակագրական տվյալները վկայում են, որ սրտի անհետաձգելի վիրահատության ծրագրի արդյունքները դրական են։  

2014թ. հունվար-հուլիս ամիսներին արձանագրվել է սրտի իշեմիկ հիվանդությունների և սրտանոթային հիվանդություններով պայմանավորված մահվան 7349դեպք, իսկ 2015թ. նույն ժամանահատվածում՝ 6928։ Մահվան դեպքերի քանակը նվազել է 421-ով: Սրտի իշեմիկ հիվանդություններից, մասնավորապես` սրտամկանի սուր ինֆարկտից, սրտամկանի կրկնակի ինֆարկտից 2014թ. հունվարի 1-ից հունիսի 30-ը մահվան  դեպքերը կազմել են 4740, իսկ 2015թ. նույն ժամանակահատվածում` 4424 կամ նվազել է 316 դեպքով:

Սրտի անհետաձգելի վիրահատություն իրականացնող բժշկական 10 կազմակերպությունում  («Նորք Մարաշ», «Էրեբունի», «Մալաթիա», Գյումրի,  Գորիսի բժշկական կենտրոններ, «Հերացի» թիվ 1 համալսարանական հիվանդանոց,  «Արմենիա»  հանրապետական բժշկական կենտրոն, «Արամյանց բժշկական կենտրոն», «Քանկոր սիրտ-անոթային բժշկական կենտրոն» և «Լևոն Հովհաննիսյանի անվան սրտաբանության ԳՀԻ») բժշկական օգնության և սպասարկման որակը և ծրագրի արդյունավետությունը գնահատելու նպատակով ՀՀ առողջապահության նախարարության ստորաբաժանումները պարբերաբար մշտադիտարկումներ են իրականացնում ։