ԳԱԱ նախագահ, ԵՊՀ նախկին ռեկտոր Ռադիկ Մարտիրոսյանն արձագանքել է «Հետքի» հրապարակմանը՝ խմբագրությանն ուղարկելով ստորեւ ներկայացվող տեքստն իբրեւ հերքում: Այն ներկայացնում ենք ամբողջությամբ: 

www.hetq.am կայքում սույն թվականի փետրվարի 15-ին հրապարակված Վահե Սարուխանյանի հեղինակային «Ովքե՞ր են սկանդալի մեջ հայտնված շվեյցարական «HSBC»-ում գումար պահած հայերը» հոդվածի  առնչությամբ:

Սույն թվականի փետրվարի 15-ին www.hetq.am կայքում հրապարակվեց Վահե Սարուխանյանի հեղինակային «Ովքե՞ր են սկանդալի մեջ հայտնված շվեյցարական «HSBC»-ում գումար պահած հայերը» հոդվածը, որում նշվում է իմ՝ ՀՀ ԳԱԱ նախագահ ակադեմիկոս Ռադիկ  Մարտիրոսյանիս անունը եւ լուսահոգի Շահե արքեպիսկոպոս Աճեմյանի անունը: Տեղեկացնում եմ, որ 1995 թ.-ին, երբ ես Երեւանի պետական համալսարանի ռեկտորն էի, Շահե արքեպիսկոպոս Աճեմյանի աջակցությամբ հիմնադրվեց ԵՊՀ-ի Աստվածաբանության ֆակուլտետը: Ֆակուլտետի ստեղծման եւ զարգացման գործում Շահե արքեպիսկոպոս Աճեմյանը ներդրել է սեփական գումարներ ամսագրերի եւ գրքերի հրատարակման, եվրոպական համալսարաններ ուսանողների ճամփորդությունների համար եւ այլն:  

Աստվածաբանության ֆակուլտետին մշտապես աջակցելու համար Շահե արքեպիսկոպոս Աճեմյանը Շվեյցարիայում 1997 թ.-ին բացեց հաշիվ, որն ուներ երկու օգտատեր, որտեղ ես երկրորդ օգտատերն էի: Մենք պայմանավորվածություն ունեինք, որ այդ գումարները կարող են ծախսվել միայն Աստվածաբանության ֆակուլտետի կարիքների համար: Այդ հաշվի բացման օրվանից մինչ օրս ես այդ հաշվի հետ որեւէ գործողություն չեմ կատարել եւ որեւէ տեղեկատվություն չունեմ հաշվի վիճակի մասին:

Ինձ համար ցավալի է, որ իմ եւ լուսահոգի Շահե արքեպիսկոպոս Աճեմյանի մասին գրված է անհարգալի ոճով մի հոդվածում, որը նման «սկանդալային» անուն ունի, եւ գրված է առանց ճշտելու իրողությունը:

Խնդրում եմ հրապարակել այս հերքումը Ձեր կայքում առանձին նյութի տեսքով:

15.02.2016 թ.

Խմբագրության կողմից. «Զանգվածային լրատվության մասին» ՀՀ օրենքի 8-րդ հոդվածը սահմանում է. «Անձն իրավունք ունի լրատվական գործունեություն իրականացնողից պահանջել հերքելու իր իրավունքները խախտող փաստացի անճշտությունները, որոնք տեղ են գտել լրատվական գործունեություն իրականացնողի տարածած տեղեկատվության մեջ, եթե վերջինս չի ապացուցում, որ այդ փաստերը համապատասխանում են իրականությանը»: Անհասկանալի է, թե, ըստ Մարտիրոսյանի, որն է իր անձին վերաբերող փաստացի անճշտությունը, եթե իրականում ոչ թե հերքել, այլ հաստատել է, որ 1997-ին շվեյցարական բանկում բացվել է հաշիվ, որի օգտատերերը եղել են ինքն ու Շահե սրբազանը: Ընդ որում՝ «Հետքը» չի նշել, թե ինչ նպատակով է օգտագործվել հաշիվը, այլ ընդամենն արձանագրել է փաստը ու նաեւ այն, որ հաշիվը եղել է կոդավորված: