Հայրենադարձության տապալո՞ւմ, թե՞ նախկին ազատամարտիկն իրեն այդպիսի բան երբեք թույլ չի տա
Հայկ Ղազարյան
Մեկ շաբաթ առաջ հայկական լրատվական կայքերում տեղադրվեց «Քաշաթաղի շրջանի ղեկավարությունը ընդդիմադիր դաշտ է դուրս եկել» հոդվածը: Նրա հեղինակն է Քաշաթաղի շրջվարչակազմի աշխատակազմի մշակույթի և երիտասարդության հարցերի բաժնի առաջատար մասնագետ Համբարձում Արզանյանը: Հոդվածում մասնավորապես ասվում է, որ քաշաթաղյան ղեկավարությունը «ընդդիմադիր» կեցվածք է ցուցաբերում ԼՂՀ իշխանությանը այն առումով, որ հայրենադարձության և վերաբնակեցման գործընթացը վերջիններիս կողմից տապալվում է:
Ավելի ուշ «Ֆեյսբուք» սոցիալական կայքում «Արցախի եվրոպական շարժում» ՀԿ-ի նախագահ Հայկ Խանումյանն իր ստատուսում գրել է. «Հերիք ա Սուրեն Խաչատրյանի, Համլետ Խաչատրյանի պես շրջանների ղեկավարներ ունենալ Քաշաթաղում, ու Ադրբեջանը կարող է հանգիստ գլուխը բարձին դնել` մի օր Քաշաթաղը սրանք կհանձնեն Բաքվին»:
Այդ հայտարարության տակ «ֆեյսբուքցիները» հանդես եկան տարբեր մեկնաբանություններով. մի կողմը կիսում էր այս տեսակետը, մյուսը` ոչ: Մի քանի հոգի դժգոհ էին նրանից, որ Հ. Արզանյանի հոդվածում կոնկրետություն չկա:
Մենք որոշեցինք կապվել Համբարձում Արզանյանի հետ: Այն հարցին, թե կոնկրետ ինչ է եղել, շրջանի ղեկավարությունը ի՞նչ ճնշումների միջոցով է խոչնդոտում վերաբնակեցման և հայրենադարձության գործընթացը, Արզանյանը պատասխանել է. «Խնդիրն այն է՝ երկար ժամանակ, կարծես կանխատեսլեով հետագա զարգացումները, աշխատել ենք համակերպվել և «դուրս չհանել մեր կեղտոտ սավանները». հարցերը լուծել ներքին կարգով: Ոչ թե ճնշումների պատճառով Քաշաթաղը դատարկվում է, այլ տեղական ղեկավարության գործողությունները հիասթափեցնում են մարդկանց: Բնակչության մի ստվար զանգվածի նկատմամբ ճնշումներ են կիրառվում` հիմնականում աշխատանքից զրկելով կամ զրկելու սպառնալիքով: Առայժմ` այսքանը»: Նա խոստացավ առաջիկայում ավելի կոնկրետ դեպքերի մասին նյութ տեղադրել:
Հ. Արզանյանը կատարեց իր խոստումը: Հաջորդ` «Ինտելեկտը Քաշաթաղում` «պերոսոնա նոն գրատա»» վերնագրով նյութը հայտնվել էր ինտերնետային լրատվամիջոցներում մի քիչ ուշ:
Բացի նրանից, որ Արզանյանը Քաշաթաղի շրջվարչակազմի աշխատակազմի մշակույթի և երիտասարդության բաժնի առաջատար մասնագետ է, այլև հանդիսանում է «Հայեր-Քաշաթաղ» ինտելեկտուալ թիմի ավագը: Թիմը սկսած 2008 թ. Լեռնային Ղարաբաղի երկու ինտելեկտուալ թիմերից մեկն է, մասնակցել է. «Ի՞նչ, որտե՞ղ, ե՞րբ» խաղի Հարավային Կովկասի առաջնություններին, որոնք տեղի են ունենում Վրաստանում և որոնց մասնակցում են թիմեր Հայաստանից, Ադրբեջանից ու Վրաստանից:
Ըստ Արզանյանի՝ ադրբեջանական պատվիրակությունն ամեն անգամ վայնասուն է բարձրացնում` առաջնության մասնակիցների ցուցակում տեսնելով այդ թիմերի անունները, իսկ հիմա, իր խոսքերով, թիմը «պրծավ»:
«Կարծում եք՝ ադրբեջանցիների հոխորտանքից վախեցա՞նք, «Ակումբների միացյալ ասոցացիան մեզ որակազրկե՞ց», «Ի՞նչ, որտե՞ղ, ե՞րբ» խաղը կորցրե՞ց իր հետաքրքրությունը: Ոչ, ոչ և նորից ոչ»,- գրում է Հ. Արզանյանը:
Նրա վերադառնալուն պես հանձնվեց աշխատակազմի ղեկավար Դավիթ Դավթյանի պահանջը` «աշխատանքից անհարգելի բացակայելու պատճառով բացատրություն ներկայացնելու» մասին:
«Մի քանի օր ստացա ծանուցում այն մասին, որ ԼՂՀ քաղաքացիական ծառայության խորհուրդը սկսել է ծառայողական քննություն` ինձ աշխատանք տալ-չտալու վերաբերյալ»,- շարունակում է Արզանյանը:
Միջնորդությունը ներակայցրել էր նույն Դավիթ Դավթյանը, ով, Արզանյանի կարծիքով, գործում է Քաշաթաղի վարչակազմի ղեկավար Սուրեն Խաչատրյանի համաձայնությամբ և քաջալերմամբ:
«Ես Խաչատրյանի հետ այդ մասին խոսել եմ անձամբ և համոզվել, որ ինձ աշխատանքից հեռացնելը նրա նվիրական ցանկություններից մեկն է»,- ասում է Հ. Արզանյանը: Սակայն ԼՂՀ Քաղծառայության խորհուրդը մերժում է Դավթյանի միջնորդությունը:
Ըստ Արզանյանի՝ հետո բացվում է մի նոր էջ. «Այսպես, օրինակ, սույն թվականի հոկտեմբերի 20-ին իր գրության մեջ նա (Դավիթ Դավթյանը) պահանջում է, որպեսզի ես բացատրություն տամ, մասնավորապես, թե որտեղ եմ եղել և ինչով եմ զբաղվել… պինդ բռնվեք… ժամը 14:15-ին»:
Համբարձում Արզանյանն ասում է, որ չի պատրաստվում «հանձնվել» և հայց է ներկայացրել դատարան` իրեն տրված տույժն անվավեր ճանաչելու պահանջով:
Մենք կապվել ենք նաև Քաշաթաղի վարչակազմի ղեկավար Սուրեն Խաչատրյանի հետ: Նա հերքում է, որ բնկաչության մի ստվար զանգվածի նկատմամբ ճնշումներ են կիրառվում` հիմնականում աշխատանքից զրկելով կամ զրկելու սպառնալիքով:
«Եկեք շրջան ու համոզվեք, որ ամեն ինչ կարգին է»,- ասում է վարչակազմի ղեկավարը: Ներկայացնենք մեր զրույցը վարչակազմի ղեկավարի հետ:
Իսկ Համբարձում Արզանյանին աշխատանքից ինչո՞ւ եք ուզում հեռացնել, պարոն Խաչատրյան: Վերջինս պնդում է, որ խոսել է Ձեզ հետ և համոզված է, որ իրեն աշխատանքից հեռացնելը Ձեր նվիրական ցանկություններից մեկն է:
Դե, շատ բան է ասում: Ասում են, որ տարբեր բաներ է գրում ինտերնետում: Իսկ ինչո՞ւ պիտի նման ցանկություն ունենամ: Նրան աշխատանքից ոչ ոք չի պատրաստվում հեռացնել: Ընդամենը նկատողություն ենք հայտարարել: Կարող եք կապվել քաղծառայության հետ ու իրենց էլ հարցնել:
Ստացվում է՝ ով ինտելեկտուալ խաղին մասնակցել է, պիտի աշխատանքից բացակայելու պատճառով խիստ նկատողությո՞ւն հայտարարել:
Ես չգիտեմ՝ ով ինչպես է մասնակցել, բայց Հ. Արզանյանը վեր է կացել ու գնացել` առանց, ինչպես կարգն է պահանջում, դիմելու ու տեղեկացնելու:
«Արցախի եվրոպական շարժում» ՀԿ-ի նախագահ Հայկ Խանումյանի կարծիքով՝ «նրանք օգտակար մարդկանց ուզում են «կոտրել», որովհետև նրանք այդ տեսակետը հասկանալ չեն կարող»:
Քարվաճառցի մտավորական Ալեքսանդր Քանանյանը նույնպես իր զորակցությունն է հայտնում Համբարձում Արզանյանին. «Ուզում եմ զգոնության կոչ հղել բոլոր նրանց, ովքեր կարծում են, որ ժամանակավոր պաշտոնավարման բերմամբ նրանց ձեռքում հայտնված վարչական լծակները կարող են շահադիտաբար կիրառվել անձնական փառամոլությունը սնուցելու, Արցախի սահմանադրական տարածքում ավատատիրական կարգեր հաստատելու և ապօրինի ոտնձգութուններով գիտակից քաղաքացիական կեցվածք ունեցող անձանց ահաբեկելու, գործազրկելու և տարածքից վտարելու համար»:
Իսկ Սուրեն Խաչատրյանին պաշտպանողները բերում են այն փաստարկը, որ նա ազատամարտիկ է եղել և չի կարող հիմա հայրենադարձությունն ու վերաբնակեցումը տապալելով զբաղվել:
« ...Ով կյանքն է վտանգել հանուն հայրենիքի, ոչ մի շահ չի կարող նրան ստիպել Քաշաթաղը դատարկել ու դատարկ հանձնել Բաքվին»,-գրում է Սուչեն Խաչատրյանի կողմնակիցներից մեկը:
Մեկնաբանություններ (8)
Մեկնաբանել