Օրեր առաջ «Ֆեյսբուք» սոցիալական ցանցում Սայադ Հարությունյանի քույրը դրահամահաք սկսեց՝ 17-ամյա եղբոր` հուլիսի 29-ին ոստիկանության կողմից հատուկ միջոցներ կիրառելու հետևանքով կորցրած աչքը արտասահմանում պրոթեզավորելու համար:

«Սուրբ Գրիգոր Լուսավորիչ» բժշկական կենտրոնի անհետաձգելի բուժօգնության գծով տնօրենի տեղակալ, բժիշկ-անեսթեզիոլոգ-ռեանիմատոլոգ Գագիկ Մանուկյանը «Հետք»-ի հետ զրույցում հայտնեց, որ այս պահին Սայադի առողջական վիճակը լավ է. երեկ արդեն տեղադրել են պրոթեզը, որպեսզի աչքի խոռոչը ձևավորվի, այսօր կամ վաղը, հնարավոր է, նրան հիվանդանոցից դուրս գրեն: Մինչև վերջնական պրոթեզի տեղադրումը Սայադը կայցելի «Ս.Վ.Մալայանի անվան ակնաբուժական կենտրոն»: Այժմ ակնագունդ է պատրաստվում, որը տեղադրվելու է ակնխոռոչում, բայց պրոթեզը որևէ ֆունկցիա չի կատարելու:

Ըստ Մանուկյանի` տղայի աչքը պրոթեզավորելու նպատակով սկսված դրահամահավաքի անհրաժեշտություն չկա: Ասում է` հիվանդանոցը իր միջոցներով պատվիրել է պրոթեզը, այն ձեռք բերելու վճարները արդեն ուղարկվել են, և երկու ամսվա ընթացքում պրոթեզը կտեղադրվի:

Բժիշկը տղայի հարազատներին բացատրել է, որ տեղադրվող պրոթեզը նույնն է լինելու, ինչ արտասահմանում տեղադրվողը:

Սայադ Հարությունյանի ընտանիքի հետ կապ հաստատել չկարողացանք: Քիչ առաջ նրա քույրը` Սուսաննա Հարությունյանը  Panorama.am-ին հայտնել է, որ  իրենք հաշվեհամար բացելու մտադրություն չեն ունեցել:

«Մեզ զանգահարեցին Գերմանիայից, Ռուսաստանից, Ֆրանսիայից ու այլ երկրներից հայեր, ասացին ուզում են մեզ օգնել, խնդրեցին հաշվեհամար բացենք ու տարածենք»,- ասաց Սայադի քույրը:

Նրա խոսքով, իրենք նախապես չեն իմացել, որ եղբոր աչքի բուժման ողջ ծախսն իր վրա է վերցրել «Գրիգոր Լուսավորիչ» ԲԿ-ն: