Տեսանյութեր
Լուսանկարներ
Արտեմ Ասատրյան. «2017-ին ևս գործելու են սոցիալական փաթեթում ներառված չորս ուղղությունները»
Աժ-ում այսօր հարց ու պատասխանի օր է։ Կառավարության անդամներն ու վարչապետը պատասխանում են պատգամավորների գրավոր և բանավոր հարցերին։
ՀՀԿ-ական պատգամավոր Ռուզան Մուրադյանը ուսուցիչների տոնին ընդառաջ աշխատանքի և սոցիալական հարցերի նախարար Արտեմ Ասատրյանից հետաքրքրվեց՝ արդյոք ուսուցիչների՝ սոցիալական փաթեթներում ներառված որոշ ուղղություններ կասեցվելու են և արդյոք նրանք հնարավորություն կունենա՞ն օգտագործել դրանցում կուտակած գումարները նաև 2017 թվականին։
Նախարար Արտեմ Ասատրյանը մեկնաբանեց, որ այս պահին գործող կարգով սոցիալական փաթեթներում որևէ փոփոխություն նախատեսված չէ, ներառված ուղղությունները շարունակում են գործել, մասնավորապես՝ սոցիալական փաթեթի շահառուները կարող են օգտագործել հանգստի ապահովման, հիպոթեքային մարման, ուսման վարձի վճարման, առողջապահական լրացուցիչ ծառայությունները։
«Սրանք գործում են և՜ գործող, և՜ աշխատանքից ազատված այն աշխատակիցների համար, ովքեր իրավունք ունեն տնօրինել իրենց կուտակած միջոցները», - նշեց նախարարը:
Անդրադառնալով սոցփաթեթում կուտակված միջոցների կանխիկացմանը՝ Ասատրյանը պարզաբանեց, որ այն կարող է իրականանալ, եթե աշխատողը աշխատանքից ազատվում կամ կենսաթոշակի է անցնում։ Ինչպես նաև յուրաքանչյուր տարվա ավարտից հետո հաջորդ տարի անձը կարող է նախորդ տարվա վճարած իր սոցիալական վճարների չափով կանխիկացնել իր փաթեթի համար փոխանցված գումարը։
Նախարարը նաև հավաստիացրեց, որ 2017 թվականի պետական բյուջեի նախագծով ևս սոցիալական փաթեթի համար նախատեսված վճարները նույն չափով պահպանված են։
Մեկնաբանել