Նիդերլանդներից Հայաստան վերադարձող քաղաքացիների վերաինտեգրման գործընթացին աջակցելու նպատակով տարածքային կառավարման և զարգացման նախարարության միգրացիոն պետական ծառայությունը և Նիդերլանդների Թագավորության անվտանգության և արդարադատության նախարարության հայրենադարձության եւ մեկնման ծառայությունը կնքել են համաձայնագիր։

Կառավարությունը այսօրվա նիստում չքննարկվող կարգով հաստատեց տարածքային կառավարման և զարգացման նախարար Դավիթ Լոքյանի որոշման նախագիծը, որով Հայաստանի կառավարությանը տրամադրվելու է դրամաշնորհ՝ Նիդերլանդներից հարկադիր վերադարձող Հայաստանի քաղաքացիներին վերաինտեգրման շրջանակներում փոքր բիզնես սկսելու կամ աշխատաշուկա մուտք գործելու աջակցության, ուսումնական կամ մասնագիտական վերապատրաստման, սոցիալական, իրավական, բժշկական աջակցության, ժամանակավոր կացարանի տրամադրման, օդանավակայանում դիմավորման և անհատական այլ կարիքների համար:

Այս գործընթացները կազմակերպելու համար միգրացիոն պետական ծառայությունը մեկ տարվա ընթացքում Նիդերլանդներից հարկադիր վերադարձող յուրաքանչյուր Հայաստանի քաղաքացուն տրամադրելու է  առավելագույնը 1000 եվրոյի աջակցություն վերը նշված ուղղություններով: Այդ ծրագիրն իրականացնելու համար Նիդերլանդների Թագավորությունը Հայաստանի միգրացիոն պետական ծառայությանը փոխանցել է 26 մլն 717,2 հազ. դրամ:

«Հայաստան վերադարձող քաղաքացիների վերաինտեգրմանը ցուցաբերվող աջակցությունը կարևորվում է հետագայում անօրինական միգրացիայի ռեցիկլյացիայի կանխարգելման նպատակով»,- ասվում է որոշման նախագծում։

Լուսանկարը՝ Հայարփի Հովհաննիսյանի