«Հետքը» մի քանի հոդվածներով անդրադարձել էր, թե ինչպես են ՀՀ առողջապահության նախարարության պաշտոնյաները Հայաստան առաքված մարդասիրական դեղերը միտումնավոր դարձրել ժամկետանց: Առողջապահության նախարարության մարդասիրական օգնության կենտրոնը տնօրինում է Միացյալ հայկական հիմնադրամից եւ այլ դոնոր կազմակերպություններից առողջապահության նախարարություն առաքված հումանիտար օգնությունը, պահեստավորում է այն, տեսակավորում եւ բաշխում:

2001-2002թթ. մարդասիրական ճանապարհով Հայաստան մուտք գործած դեղերից ժամկետանց են դարձել մոտ մեկ մլրդ դրամի դեղեր: 2001թ. օգոստոսից մինչեւ 2002թ. նոյեմբեր այդ դեղերի բաշխումը կատարել է ՀՀ Առողջապահության նախարարության (ԱՆ) դեղորայքային եւ տեխնոլոգիական ապահովման վարչության պետ Արտաշես Բիշարյանը: 

Ժամկետանց դեղորայքի առաջացման պատճառը հիմնականում դեղի բիզնեսի տերերի գործունեության խթանումն է եղել, այսինքն` հումանիտար դեղորայքի բաշխումը միտումնավոր դանդաղեցվել է, որպեսզի կարողանան իրացնել դեղերի վաճառքով զբաղվող իրենց սեփական ընկերությունների դեղերը: 

Մենք հրապարակել էինք նաեւ մի փաստ այն մասին, որ Ա. Բիշարյանը 26 մլն դրամի մարդասիրական դեղ է հատկացրել Հրազդանի թիվ 2 պոլիկլինիկային, որը վաղուց օպտիմալացվել էր: Իրականում Հրազդանում նման հիմնարկ չկար: Սեւանի առաջին ատյանի դատարանում այսօր քննվում է այս գործը, սակայն դեղհատկացման փաստաթղթերի տակ ստորագրած Ա. Բիշարյանը այս գործով ոչ մի պատասխանատվություն չի կրում: Չնայած նա գիտեր, որ նման բուժհիմնարկ Հրազդանում գոյություն չունի: Ֆինանսների նախարարությունն ավարտել է մարդասիրական կենտրոնի ֆինանսական փաստաթղթերի ուսումնասիրությունը: Մեր ունեցած տեղեկություններով, այդ ուսումնասիրության արդյունքում «ակնառու» չարաշահումներ չեն հայտնաբերվել: 

Հուլիսի 13-ին Նախագահ Քոչարյանի եւ գլխավոր դատախազ Աղվան Հովսեփյանի հանդիպման ժամանակ քննարկվել է այս հարցը, բայց թե հատկապես ինչ է քննարկվել, անհայտ է: Այս քննարկումից երկու օր առաջ ՀՀ Նախագահ Քոչարյանը հանդիպել է նաեւ Միացյալ հայկական հիմնադրամի նախագահ Հարութ Սասունյանին: Այս հանդիպման ժամանակ էլ քննարկվել են մարդասիրական դեղերի արդյունավետ եւ արդար բաշխման խնդիրները: 

Ինչպես արդեն նշել ենք, ժամկետանց դարձած դեղերի փաստի առթիվ հարուցված է քրեական գործ: Բայց տարօրինակ փաստ. Գլխավոր դատախազությունում չի հարցաքննվել Արտաշես Բիշարյանը, ում ղ եկավարության ժամանակ է ժամկետանց դարձել մեկ միլիարդ դրամի մարդասիրական դեղորայքը: 2003 -ին նրան մի անգամ հրավիրել են դատախազություն, սակայն հրաժարվել է ներկայանալ: 

Պարզվում է, որ Հայաստանում հնարավոր է նաեւ չկատարել դատախազության պահանջները: Այնպես որ, այս պատմության հավանական ավարտն այն է լինելու, որ որեւէ մեկը չի պատժվի դեղորայքը ժամկետանց դարձնելու եւ սոցիալապես անապահով խավերին իրենց հատկացված մարդասիրական օգնությունից զրկելու համար: