ՀՀ վարչապետ Տիգրան Սարգսյանն այցելել է արտաքին գործերի նախարարության դիվանագիտական դպրոց և հանդես եկել դասախոսությամբ: Նա դպրոցի ունկնդիրներին է ներկայացրել Ազգային ժողովի ընդունած կառավարության ծրագիրը:

«Մեր հիմնարար սկզբունքն այն է, որ ժամանակակից աշխարհում պետք է կառուցել գիտելիքի վրա հիմնված տնտեսություն: Զարգացած են համարվում այն երկրները, որոնք ոչ թե ապրանք, այլ գիտելիք են արտադրում»,- ասել է Տիգրան Սարգսյանը:

Նրա խոսքերով՝ նշված հիմքերի վրա հենվելով՝ կառավարությունը ձգտում է ապահովել տնտեսական աճ:

Տիգրան Սարգսյանը պատասխանել է նաև դպրոցի ունկնդիրների հարցերին, որոնք մասնավորապես վերաբերում էին ֆինանսատնտեսական ճգնաժամի հետևանքների հաղթահարմանը, էներգետիկային, տարածքային համաչափ զարգացմանը, արտահանմանը և այլն: