2012 թ. պետբյուջեի հատկացումներով կմեկնարկեն Սանահին վանական համալիրի մասնակի վերականգնման և ամրակայման աշխատանքները: Համապատասխան մասնագետները անհրաժեշտ լուծումներ կտան նաև բուսածածկի և տանիքների ջրամեկուսացման խնդիրներին:

ՀՀ մշակույթի նախարարությունը հայտնում է, որ վանական համալիրի հետագա անխաթար պահպանության նպատակով 2011 թ. շարունակել է իրականացնել համալիրի առանձին հուշարձաններում առկա խնդիրներին ուղղված մի շարք աշխատանքներ:

- Մշակույթի նախարարության «Պատմամշակութային ժառանգության գիտահետազոտական կենտրոն» ՊՈԱԿ-ի և Բեռլինի բարձրագույն տեխնոլոգիաների համալսարանի համագործակցությամբ ուսումնասիրվել է կառույցների տեխնիկական վիճակը:

- Նախարարության հրավերով իտալացի մասնագետները մանրամասն չափագրել են վանական համալիրի բոլոր հուշարձանները:

- Պետական բյուջեի միջոցներով իրականացվել են պահպանվածության առումով առավել վտանգված Սբ. Ամենափրկիչ եկեղեցու հուշարձանամերձ տարածքի հնագիտական պեղումներ ու կառույցի ինժեներաերկրաբանական հետազոտություններ:

- Կազմվել են Սբ. Ամենափրկիչ եկեղեցու և գավիթի, Սբ. Աստվածածին եկեղեցու և գավիթի, Գրիգոր Մագիստրոսի ճեմարանի մասնակի ամրակայման, վերականգնման նախագծային առաջադրանքները: Իրականացվել է հուշարձանի վերականգնման համար պահանջվող նախագծանախահաշվային փաստաթղթերի կազմման և ձեռքբերման համար նախատեսված գնումների գործընթացը: 2011 թ. նոյեմբերին հաղթող կազմակերպության հետ կնքվել է համապատասխան պայմանագիր, և վերջինիս են տրամադրվել կատարված բոլոր հետազոտությունների արդյունքներն ու նշված հուշարձանների մանրամասն չափագրությունները:

- Անհրաժեշտ աշխատանքները, որոնք կկատարվեն պետական բյուջեի հաշվին, նախատեսվում է ավարտել 2012 թ. մայիսին: