Գլխավոր դատախազությունում ստացվել և ուսումնասիրվել են ազգային անվտանգության ծառայության տնօրենի կողմից ոստիկանության պետին ուղղված գրության հիման վրա ոստիկանության ՊՊԳ վարչությունում իրականացված ծառայողական քննության շրջանակում կատարված հիշյալ վարչության կարևորագույն օբյեկտների և հիմնարկ-ձեռնարկությունների պահպանության գնդի 2015-2018թթ. ֆինանսական գործունեության ստուգման վերաբերյալ փաստաթղթերը:

Ինչպես տեղեկացնում է դատախազության հանրային կապերի բաժինը, ստուգման արդյունքում պարզվել է, որ 6 տնտեսվարող սուբյեկտների հետ կնքվել են ծառայությունների մատուցման պայմանագրեր, որոնց հիման վրա մատուցված ծառայությունների համար ստացված առանձնապես խոշոր չափի՝ 109 990 200 դրամը ոստիկանության ՊՊԳ վարչության կարևորագույն օբյեկտների և հիմնարկ-ձեռնարկությունների պահպանության գնդի աշխատակցի կողմից չի մուտքագրվել գնդի արտաբյուջետային հաշվեհամարին:

Բացի այդ, առերևույթ տվյալներ են ձեռք բերվել նաև այն մասին, որ նշված հափշտակության իրականացումը հնարավոր է եղել ոստիկանության ՊՊԳ վարչության ղեկավար աշխատակիցների կողմից ծառայության նկատմամբ դրսևորած անփույթ վերաբերմունքի հետևանքով:

Նկատի ունենալով, որ իրականացված ծառայողական քննության նյութերում առերևույթ առկա են յուրացմամբ առանձնապես խոշոր չափերով հափշտակություն կատարելու, ինչպես նաև ծանր հետևանքներ առաջացրած պաշտոնեական անփութության հատկանիշներ պարունակող բավարար տվյալներ՝ գլխավոր դատախազության hատկապես կարևոր գործերով քննության նկատմամբ հսկողության վարչությունում փաստի առթիվ հարուցվել է քրեական գործ՝ քրեական օրենսգրքի 179-րդ հոդվածի 3-րդ մասի 1-ին կետով և 315-րդ հոդվածի 2-րդ մասով:

Քրեական գործը նախաքննություն կատարելու հանձնարարությամբ ուղարկել հատուկ քննչական ծառայություն:

լուսանկարը՝ ppgv.am-ից