«Մենք օրեր առաջ ակցիայով դիմեցինք մեր պաշտոնյաներին' պահանջելով անհապաղ դադարեցնել Կամերային երաժշտության տան դիմաց կառուցվող սրճարանի շինարարությունը, սակայն ոչ մի արձագանք չեղավ, հակառակը' ավելի մեծ թափով է ընթանում այն: Մենք կորցրել ենք Օպերային հարակից կանաչ տարածքը եւ թույլ չենք տա խլել արվեստագետների ունեցած եւս մի տուն: Այդ սրճարանային կառույցը պետք է այստեղ չլինի'»,-վրդովված ասաց երգչուհի Արաքս Դավթյանը Կոմիտասի անվան կամերային երաժշտության տան դիմաց «մոդեռն» սրճարանի շինարարության դեմ հոկտեմբերի 21-ին կազմակերպված երկրորդ ակցիայի ժամանակ: (Տես նաեւ' «Մոդեռն սրճարան»' դասական երաժշտության հաշվին)

Երաժիշտների պահանջին միանալով' երկրորդ ակցիան նախաձեռնել էր « SOS Երեւան» դաշինքը: «Մենք ստեղծել ենք « SOS Երեւան» դաշինքը, որում ընդգրկված ՀԿ-ների, մտավորականների խնդիրն է պայքարել Երեւանի կանաչ գոտիների պահպանման համար: Այսօր մենք հավաքվել ենք Կամերայինի առաջ, բայց դաշինքը մտահոգ է ամբողջ Երեւանի կանաչ գոտիներով»,-բացատրեց «Հայաստանի անտառներ» ՀԿ-ի նախագահ æեֆրի Թուֆենկյանը:

Երկրորդ հավաքն ավելի բազմամարդ էր' ներկա էին մտավորականներ, հարակից շենքերի բնակիչներ: Ակցիային մասնակցում էր նաեւ Երեւանի նախկին քաղաքապետ Սուրեն Աբրահամյանը, ում ղեկավարության օրոք տեղի է ունեցել Օղակաձեւ զբոսայգու այս հատվածի հողահատկացումը: «Ես մտավորականներից ամաչելով եմ եկել: Եթե չեմ սխալվում, 1998թ. ես 3 տարով այս տարածքը վարձակալության եմ տվել «Ֆլորա լենդ» ընկերությանը: Սակայն ես ոչ մի շինթույլտվություն չեմ տվել: Ես ընդունել եմ բարեկարգելու, լուսավորելու, նստարաններ դնելու որոշում: Եւ իսկապես, այդ ընկերությունն այդ ամենն արել է: Այս տարածքի հետագա ճակատագրի համար ես պատասխանատու չեմ: Ես միանում եմ այս ակցիային եւ այս գրեթե կառուցված սրճարանը քանդելու գործում ես ձեզ հետ եմ եւ առաջինը կքանդեմ»,-ասաց Ս. Աբրահամյանը' կոչ անելով մտավորականությանը չլռել ու պայքարել:

«Պետք է ազգովի ոտքի կանգնենք, Երեւանը կորցրել է իր դեմքը: Չպետք է թույլ տանք այս տարածքի հետ վարվեն այնպես, ինչպես թույլ տվեցինք վարվեն Օպերայի շուրջ: Պետք է մտահոգվենք ու ցավանք ամեն ինչի համար, այլապես վաղը կունենանք ամայի, փոշոտ, քարքարոտ ու աղբով լեցուն երկիր Հայաստան»,-ավելացրեց դերասան Սոս Սարգսյանը:

«Ամբողջ Եվրոպան այդչափ սրճարան չունի, որչափ Հայաստանը:Հայ ժողովուրդը հզոր է ու հարուստ իր մշակույթով, եթե այս սրճարանը կառուցվի, ապա դա ապտակ է արվեստագետներին: Ես արդեն չորս տարի է գալիս եմ Հայաստան եւ կամերային տանը համերգ եմ տալիս: Եթե այս սրճարանը կառուցվի, ես հաջորդ տարի չգիտեմ, թե որտեղ եմ ելույթ ունենալու: Մի' մեռցրեք արվեստագետների հանճարը, եթե մենք մշակույթով տկարանանք, կվերջանանք»,- կառավարությանը դիմեց նյույորքցի դիրիժոր Րաֆֆի Սվաճյանը:

Երաժիշտներն ավելի մտահոգ են, որ սրճարանի կառուցումից հետո հնարավոր չի լինի աշխատել Կամերային երաժշտության տանը, իսկ բնապահպան ՀԿ-ները վրդովված են. նրանց գործունեության 5 տարիների ընթացքում կարծես ոչինչ չի փոխվում, ու էլ ավելի թափով են վերանում կանաչ գոտիները: «Երեւանի կենտրոնն այլեւս մարդաբնակ չի կարող լինել, այն ամենաաղտոտված մասն է, անիմաստ է կառուցել էլիտար տներ ու այսքան ռեստորաններ, այստեղ արդեն հնարավոր չէ ապրել: Սկզբում չորացնում են կանաչը, չեն ջրում ու մշակում, հետո փոխարենը սրճարան են կառուցում: Մինչեւ ո՞ր աստիճան է իջնելու մեր բարոյական անկումը, մենք հիմա նախընտրում ենք միայն ռեստորաններ, սթրիփտիզ ակումբներ ու խաղատներ: Առաջարկում եմ Ազգային ժողովին անցկացնել լսումներ Երեւանի էկոլոգիական վիճակի, հատկապես կանաչ տարածքների վերաբերյալ, երեւանցին այլեւս օդ չունի շնչելու»,-մտահոգություն հայտնեց «Հանուն մարդկային կայուն զարգացման» ասոցիացիայի նախագահ Կարինե Դանիելյանը:

Ակցիայի ավարտին, երբ մասնակիցներն արդեն ցրվել էին, Կամերայինի տարածքում պտտվում էր Երեւանի քաղաքապետի խորհրդական Հրաչիկ Մուրադյանը: Զարմանքով հարցրինք' արդյոք նա մասնակցու՞մ էր ակցիային եւ ի պաշտոնե՞ է զբոսնում կիսակառույց սրճարանի շուրջը: Հ. Մուրադյանը նախ հետաքրքրվեց, թե ինչ ակցիա էր եւ ինչի համար, հետո ասաց, որ փնտրում է շինարարներին, որպեսզի խնդրի դադարեցնել շինարարությունը: «Շինարարներն ունեն շինթույլտվությունը, բայց եթե մարդիկ հավաքվում, ակցիա են անում, ուրեմն պետք է դադարեցնել, որ ուսումնասիրենք եւ վերանայենք»: Երբ նրան տեղեկացրինք, որ երկու օր առաջ էլ է ակցիա եղել, եւ քաղաքապետարանը որեւէ կերպ չի արձագանքել, պարզվեց, որ քաղաքապետի խորհրդականը տեղյակ չի եղել' չնայած ակցիային անդրադարձել էին բոլոր օրաթերթերն ու մի քանի հեռուստաընկերություններ: Նա ասաց, որ այս անգամ էլ տեղյակ չէր լինի, ուղղակի «զանգեցին, ասացին, որ մարդիկ են հավաքվել, ես էլ եկա: Հիմա կգտնեմ շինարարներին ու կխնդրեմ դադարեցնել, մինչեւ ուսումնասիրենք այս հարցը»,- ասաց Հ. Մուրադյանը եւ հեռացավ շինարարներին փնտրելու:

Մինչ քաղաքապետարանը «տեղեկանա եւ ուսումնասիրի», « SOS Երեւան» դաշինքը շարունակական միջոցառումներ է նախատեսում ի պաշտպանություն Երեւանի կանաչ գոտիների' ֆորում, որին մասնակցելու են ոչ միայն դաշինքի անդամները, այլ նաեւ կառավարության տարբեր գերատեսչությունների ներկայացուցիչներ: Հոկտեմբերի 29-ին նախատեսվում է երթ Կամերային երաժշտության տնից մինչեւ Օպերա:

«Քաղաքը քաղաք է այնտեղ զարգացող մշակույթով, որի անբաժանը մասը կանաչն է: Ծառն էլ է մշակույթ: Այսօր անխնա վերացվում է ծառն ու կանաչը,- հավաքվածներին դիմեց ճարտարապետ Արմեն Հախնազարյանը,-եթե այսպես պիտի շարունակվի, ուրեմն մենք բոլորս արժանի ենք այս վիճակին, մենք իրավունք չունենք լռելու»: