Այսօր լրագրողների հարցերին պատասխանում էր ՀՀԿ խմբակցության ղեկավար Գալուստ Սահակյանը:

Դուք ԲՀԿ-ին մրցակից համարո՞ւմ եք:

Մենք մրցակից ենք համարում բոլոր այն կուսակցություններին, որոնք կընդգրկվեն ընտրական պրոցեսներին: Բայց հակառակորդ կամ թշնամիներ, կարծում եմ, չենք համարելու:

Դուք կլինե՞ք ՀՀԿ ցուցակում:

Եթե դուք մեծ ցանկություն ունենաք, ես էլ կլինեմ:

Իսկ անկախ մեր ցանկությունի՞ց:

Եթե դուք ցանկություն չունենաք, ես կլինեմ:

Անկախ մեր ցանկությունից՝ Դուք կլինե՞ք, թե՞ չեք լինի:

Ես ավելի բարձր ծանրաձողի կողմնակից եմ, և ես միշտ կլինեմ քաղաքական դաշտում:

Ինչպե՞ս կգնահատեք Սոչիի եռակողմ հանդիպումը:

Կազանի հանդիպումից առաջընթաց կա, ամբողջ հանդիպման այն պայմանավորվածությունները, որոնք հայտարարությունների մեջ ընդգրկված էին, դա կազանյան հանդիպումից հետո որոշակի պարտավարություն է ադրբեջանական կողմի վրա: Ես այն գործիչը չեմ, որ այս անգամ էլ հավատամ Ալիևին և որպես հայտարարող կողմ մտածեմ, որ պրակտիկայում Ալիևը գործողոության մեջ կդնի այդ ամենը: Համենայն դեպս, խաղաղ գործընթացների տրամաբանությամբ է գնում: Կարծում եմ՝ աշխարհի զինանոցում այլ մի գործիք չկա բացի պայմանավորվածությունները, դիվանագիտական քննարակումները, բանակցությունները: Մյուս կողմն արդեն պատերազմն է, և բազմիցս կրկնել ենք՝ չենք երկնչում պատերազմից, բայց լուծումը տեսնում ենք խաղաղ ճանապարհում: Սա մեր որդեգրած քաղաքականությունն է, որը արտահայտվեց նաև Սոչիի բանակցություններին, որի տակ ստորագրեց նաև փոքր Ալիևը:

Դուք ասացիք, որ այն քաղաքական գործիչը չեք, որ հավատաք Ալիևի խոսքերին, Դուք կարծում եք՝ այս ժողովուրդը այն ժողովո՞ւրդն է, որ նորից հավատա Հանրապետականին:

Ժողովուրդը ոչ թե Հանրապետականին է հավատում, և հեչ պետք չի, որ որևէ կուսակցության հավատա: Ժողովուրդը հավատում է իր ճակատագրին, և որոնում, գտնում է այն մարդկանց, ովքեր կարող են տնօրինել այդ ճակատագիրը:

Այսինքն՝ Հանրապետակա՞նն է ժողովրդի ճակատագիրը:

Կուսակցությոնները ընդամենը միջոց են, նպատակ չեն: Էնպես որ ժողովրդի համար ոչ Հանրապետական, ոչ որևէ կուսակցություն նպատակ չէ: Եվ ժողովուրդն էլ պարտավոր չէ որևէ մեկին հավատալու: Ժողովուրդը գալիս է, իր ձայնը տալիս է, իսկ եթե դուք չեք հավատում, ես չեմ պատրաստվում ձեզ հավատավոր դարձնել: