Զարգացած պետություն, տնտեսական առաջընթաց և ներգաղթ. ուջանցի բժշկի տեսլականը
Արագածոտնի մարզի 18/21, 18/22 ընտրատեղամասերը տեղակայված են Ուջան գյուղում: Ի տարբերություն Աշտարակ քաղաքի մի շարք ընտրատեղամասերի, Ուջան գյուղի երկու ընտրատեղամասերում նկատելի ակտիվություն կար, խանդավառ զրույցներ ընտրության շտապող գյուղացիների շարքերում:
Նկատելով լրագրողի` պապիկները խոսքի իրավունք էին պահանջում, հորդորում անպայման նկատել իրենց գյուղի ակտիվությունը: Իմ հարցին, թե արտառոց դեպքեր չեն նկատել ընտրատեղամասերում, տարածքում, պապիկներից մեկը պատասխանեց . «Ո՞վ կռնա, միլպեդ լէ մեր գյուղից է, գինա՞ս, ազնիվ, արդար, ժողովրդասեր տղա է, շատ մաքուր կաշխատի, ինք լէ կհեդևի ամբողջ մեր մարզի կարգուկանոնին»:
Խոսքը Արագածոտնի ոստիկանապետ Ալբերտ Երիցյանի մասին է, որը քվեարկեց Ուջանի 18/21 ընտրատեղամասում:
Երկու հանձնաժողովների ԲՀԿ-ական նախագահները գոհ են ընտրական գործընթացից, որևէ խախտման փորձ նույնիսկ չեն նկատել, աշխատում են համակարգված:
18/22 ընտրատարածքի բակում հանդիպեցինք գյուղացիների «փրկիչ», ընտրական գործընթացներում մշտապես ակտիվ Նաիրի Մանվելյանին (առաջին նկարում ինքն է): Ըստ բժիշկ Մանվելյանի` Ուջանում բոլոր ընտրություններին իրական, առողջ մրցակցություն է եղել, այս անգամ ևս բացառություն չէ. «Ուջանն արտացոլում է հայաստանյան այսօրվա պատկերը, ասես փոքրիկ Հայաստան է ամբարված Ուջանի ներսում: Ուջանցին միշտ, այսօր հատկապես ընտրում է իր կամքին համապատասխան, չի ընկրկել, պայքարել է և այժմ երկրի ապագայի, երազած ապագայի իրագործման համար է ընտրում»:
Բժշկի խոսքով` ի տարբերություն նախորդ ընտրությունների, այս անգամ ակնառու է ընտրողների բարձր տրամադրությունը, հավատն առ սեփական քվեի կարևորությունը:
Զարգացած պետություն, տնտեսական առաջընթաց և ներգաղթ, այս է ուջանցի բժշկի տեսլականը:
Մարիամ Սիրունյան
Մեկնաբանել