«Ազատ դեմոկրատներ» կուսակցությանը

«Բարգավաճ Հայաստան» կուսակցությանը

«Ժառանգություն» կուսակցությանը

Հայ Ազգային Կոնգրեսին

Հայաստանի Հանրապետական կուսակցությանը

«Հայ Յեղափոխական Դաշնակցություն» կուսակցությանը

«Օրինաց երկիր» կուսակցությանը             

Ինչպես տեղյակ եք, 2010 թվականին Նալբանդյան 106/1 հասցեում 2005թ. Ազգային ժողովի կողմից ընդունված «Նախադպրոցական կրթության մասին» ՀՀ օրենքի 30-րդ հոդվածի 4-րդ կետի կոպիտ խախտմամբ նախկին մանկապարտեզի տեղում սկսվեցին բազմահարկ շենքի շինարարական աշխատանքներ, որոնք այժմ պաշտոնապես կասեցված են:

Ավելի քան երեք հարյուր ընտանիքի երեխաներ զրկվեցին մանկապարտեզից, բակից, առողջ կենսամիջավայրից, որի փոխարեն կառուցապատողը նախատեսել է մանկապարտեզը տեղավորել բարձրահարկ շենքի առաջին հարկում, որի տակ ստորգետնյա երկհարկ ավտոկայանատեղի պետք է գործի:

Նախատեսվող բազմահարկ շենքերը իրական վտանգ են ներկայացում հարակից շենքերին, և առաջացրել են բնակիչներիս արդարացի դժգոհությունը: Մեր բակը, որն այժմ վերածվել է շինհրապարակի, պարփակված է 50-60-ական թվականներին կառուցված 4-7 հարկանի բնակելի շենքերով: Մեր ստացած բոլոր պաշտոնական փաստաթղթերի համաձայն՝ նախատեսվող շինարարությունը բակի կենտրոնում անթույլատրելի է բնապահպանական, քաղաքաշինական նորմերի և սեյսմիկ անվտանգության առումով: Հայտնում ենք, որ ՀՀ Արտակարգ իրավիճակների նախարարության աշխատակազմի ղեկավարից ստացել ենք 09.09.2011-ի N7/153/1743-1 պատասխան գրություն, որում մասնավորապես ասված է, որ հարակից շենքերի սեյսմակայունությունը չի համապատասխանում Երևանի տարածքի համար ՀՀՇՆ II-6.02-2006թ. նորմերով սահմանված չափանիշներին, ուստի սեյսմիկ ռիսկի տեսանկյունից այդ շենքերը համարվում են խոցելի:

Այսպիսով, բազմահարկի հիմնափորման աշխատանքների ընթացքում կարող են վտանգվել և վնասվել հարակից հին շենքերի հիմքերը, վերանալու է բակի կանաչ տարածքը՝ կենսունակ հաստաբուն ծառերով, խաթարվելու է շրջակա շենքերի համար լույսի և քամու շարժը՝ ամառային ամիսներին միջավայրը դարձնելով մարդկանց համար անտանելի մի վայր: Առանց այդ էլ խիտ բնակեցված տարածքը դառնալու է գերխիտ բնակեցված` դրանից բխող երթևեկության, դեպի բակ մուտք ու ելքի դժվարություններով և աղմուկով:  

Դիմելով ձեզ, որպես Հայաստանի Հանրապետությունում գործող քաղաքական ուժի, հայցում ենք ձեր անհապաղ միջամտությունն ու աջակցությունը ձեր լիազորությունների շրջանակներում՝ օգնելու նշված տարածքի բնակիչներին կանխել հերթական անհիմն և աղետաբեր շինարարությունը Նալբանդյան 106/1 հասցեում և ձեր լիազորությունների շրջանակներում նպաստել, որպեսզի նշված տարածքի բարեկարգումը իրականացվի ոչ թե հեթական էլիտար շենքի կառուցմամբ, այլ բնակիչների մեծամասնության համար ընդունելի տարբերակով:         

Մենք դիմել են համապատասխան բոլոր ատյաններին, անգամ դատարան և ՀՀ մարդու իրավունքների պաշտպանի գրասենյակ: Առայժմ, ցավոք, ապարդյուն:

Երախտագիտությամբ նշում ենք, որ մինչ այժմ նշված խնդիրը բարձրաձայնել և մեզ գործնականում աջակցել են «Ժառանգություն» և «Հայ Յեղափոխական Դաշնակցություն» կուսակցությունների պատգամավորները: Այնուամենայնիվ, հաշվի առնելով հարցի լրջությունը և գրեթե փակուղային իրավիճակը՝ ստիպված ենք կրկին դիմելու՝ ընդգծելով խնդրի հրատապությունն ու լրջությունը և հայցելով ձեր աջակցությունը:

Վստահ ենք, որ ձեր ծանրակշիռ խոսքն ու դիրքորոշումը կարող են նպաստել հանրության առջև ծառացած այս կենսական խնդրի լուծմանը, ինչը նաև դրական նախադեպ կհանդիսանա նմանատիպ այլ խնդիրների լուծման համար:

Լիահույս ենք, որ ձեր կուսակցությունը անտարբեր չի գտնվի բնակիչների բողոքի ձայնի հանդեպ և իր դիրքորոշումը կհայտնի անօրինական քաղաքաշինության ձևավորված արատավոր պրակտիկայի վերաբերյալ: 

Հարգանքով՝ 

Սայաթ-Նովա պողոտայի, Թումանյան,

Նալբանդյան և Ավագ Պետրոսյան

փողոցների բնակիչներ