Նախապես հաղորդել ենք, որ մարտի 5-ին Սամցխե-Ջավախքի հայկական հասարակական կազմակերպությունների խորհրդի համակարգող, «Ա-Ինֆո» լրատվական գործակալության տնօրեն Արտակ Գաբրիելյանը ժամանել է Եվրոպա, քաղաքական եւ համայնքային մի շարք հանդիպումների համար։

Մարտի 6-ից Արտակ Գաբրիելյանը Բրյուսելում է, որտեղ հանդիպումներ է ունենում Եվրոխորհրդարանի անդամների եւ Եվրոմիության այլ կառույցների ներկայացուցիչների հետ։ Սամցխե-Ջավախքի հայկական հասարակական կազմակերպությունների խորհրդի համակարգողի Բրյուսել այցելությանը աջակցում է Հայ Դատի Եվրոպայի հանձնախմբի Բրյուսելի գրասենյակը։

Մարտի 6-ին Եվրոխորհրդարանում, ՍՋՀՀԿ Խորհրդի համակարգողը առանձին հանդիպումներ է ունեցել Եվրոխորհրդարանի փոխ նախագահ Եորղոս Փափասթամքոս (Եվրոխորհրդարանի Հարավային Կովկասի պատվիրակության անդամ), Թրայան Ունկուրեանուի (Եվրոխորհրդարանի արտաքին հարաբերությունների հանձնախմբի անդամ եւ Սեւ ծովյան հարցերի զեկուցաբեր, Եվրոնեստի փոխ նախագահ) եւ Անդրեյ Քովաչեւի հետ (Եվրոխորհրդարանի արտաքին հարաբերությունների հանձնախմբի փոխ նախագահ)։

Մարտի 7-ին Ա. Գաբրիելյանը առանձին հանդիպումներ է ունեցել Եվրոխորհրդարանի անդամներ Չարլզ Թանոկի  (անդամ՝ արտաքին հարաբերությունների եւ մարդու իրավունքների հանձնախմբերի), Յիրի Մաշթալքաի (Եվրոխորհրդարանի բյուրոյի անդամ, Եվրոնեստի անդամ), Քրիստոֆ Լիսեկի (Եվրոխորհրդարանում Վրաստանի մասին զեկուցաբեր, փոխ նախագահ՝ անվտանգությանան եւ պաշտպանության հանձնախմբի, անդամ՝ արտաքին հարաբերությունների հանձնախմբի), Եվկենի Կիրիլովի (Եվրոխորհրդարանում Հարավային Կովկասի մասին զեկուցաբեր, անդամ՝ արտաքին հարաբերությունների հանձնախմբի, ինչպես նաեւ Հարաւային Կովկասի պատվիրակության եւ Եվրոնեստի), Յաննիս Կասուլիդիս (Եվրոպական ժողովրդական կուսակցության փոխնախագահ, Եվրոխորհրդարանի արտաքին հարաբերությունների հանձնախմբի անդամ), եւ Միլոսլավ Րանսդորֆ (Եվրոնեստի անդամ) հետ։

Մարտի 8-ին, ՍՋՀՀԿ Խորհրդի համակարգողը առանձին հանդիպումներ է ունեցել Եվրոխորհրդարանի պատգամավոր եւ Եվրոնեստի անդամ Տատիանա Ժտանոկայի ու Յաննիս Ցուկալասի հետ։

Մարտի 9-ին, Սամցխե-Ջավախքի հայկական հասարակական կազմակերպությունների խորհրդի համակարգող Արտակ Գաբրիելյանը այցելել է Հայաստանի Եվրոպացի Բարեկամներ կազմակերպության կենտրոնատեղի, որտեղ հանդիպել է կազմակերպության գլխավոր քարտուղար Մայքլ Քամբեքի հետ։

Նույն օրը, Արտակ Գաբրիելյանը այցելել է Եվրոմիության արտաքին գերատեսչության կենտրոն եւ հանդիպել Վրաստանի հետ հարաբերությունների վերաբերյալ հարցերով պատասխանատուի հետ։

Հանդիպումների ժամանակ Արտակ Գաբրիելյանին ընկերակցել են Հայ Դատի Բրյուսելի գրասենյակի պատասխանատու Գասպար Կարապետյանն ու Պետո Դեմիրճյանը՝  գրասենյակի աշխատակազմից։

Իր բոլոր հանդիպումների ժամանակ, Արտակ Գաբրիելյանը իր խոսակիցներին հանձնել է Սամցխե-Ջավախքի հայկական հասարակական կազմակերպությունների խորհրդի կողմից հուշագիրը, որտեղ ներկայացված են երկրամասի հայության դիմագրաված խնդիրներն ու դրանք լուծելու ճանապարհները, ներկայացվում են Ջավախքի հայության պահանջները.

ա) Վերջ տալ երկրամասի ժողովրդագրական պատկերը փոխելու ճիգերին.

բ) Տեղական եւ պետական կառավարման կառույցներում բարելավել հայերի   ներկայացվածությունը.

գ) Սոցիալական եւ տնտեսական զարգացման ծրագրեր երկրամասում, նրա մակարդակը այդ բնագավառներում հավասարեցնելու համար երկրի մնացյալ շրջանների վիճակին.

դ) Ազգաբնակչության հայ մեծամասնություն ունեցող վարչական շրջանների կառավարման մարմիններում հայոց լեզվի օգտագործման իրավունք.

ե) Վրաստանի կազմում ինքնավար տարածքային միավորի կարգավիճակ Սամցխե-Ջավախքին եւ հարակից Ծալկա շրջանին։

Սամցխե-Ջավախքի հայկական հասարակական կազմակերպությունների խորհրդի համակարգողն իր խոսակիցների համար մանրամասնեց այս հարցերը եւ շեշտեց, թե ինքը  Բրյուսելում է, որովհետեւ Վրաստանի կենտրոնական իշխանությունները չեն պատասխանում իրենց հարցերին, ընթացք չեն տալիս հանդիպումներ ունենալու իրենց դիմումներին, եւ որովհետեւ Խորհուրդը ցանկանում է, որ Եւրոմիությունը, եւ ընդհանրապես Եվրոպան, աջակցեն իրենց բարեկամ Վրաստանին՝ ճիշտ ձեւով լուծելու Ջավախքի խնդիրները։ 

Մարտի 9-ին Արտակ Գաբրիելյանը մեկնել է Ֆրանսիա՝ հայ համայնքի հետ հանդիպումների համար։ Նույն օրը, նա հարցազրույց է ունեցել Փարիզի ԱյփԷֆԷմ րադիոյի հետ եւ երեկոյան հանդիպում՝ համայնքի հետ։ Մարտի 10-ին համայնքի հետ հանդիպում  կայացել է Լիոն քաղաքում, իսկ մարտի 11-ին՝ Մարսելում։

Շարունակվում է Սամցխե-Ջավախքի հայկական հասարակական կազմակերպությունների խորհրդի համակարգողի աշխատանքային այցը Եվրոպա։

Ա-Ինֆո