![](/static/articles/01/18/46/l-LMFECheSuZ.jpg)
ՀՀԿ-ի թեկնածուները հայտնի են
Ազգային ժողովի ընտրություններին մասնակցելու համար այսօր ընտրատարածքային հանձնաժողովներ առաջադրման փաստաթղթեր են ներկայացրել մի քանի թեկնածուներ:
Երեւանի թիվ 2 ընտրատարածքում (Նոր Նորք) այսօր առաջադրվել է Հանրային հեռուստաընկերության «Առաջին լրատվական» ծրագրի տնօրեն Սամվել Ֆարմանյանը: Նշենք, որ վերջինս եղել է հանրապետության նախագահի մամուլի քարտուղարը եւ անդամակցում է Հանրապետական կուսակցությանը: Նույն ընտրատեղամասից երեկ առաջադրվել է նաեւ անհատ ձեռնարկատեր Ալբերտ Սարգսյանը:
Թիվ 3 ընտրատարածքից (Քանաքեռ-Զեյթուն, Նոր Նորք) այսօր առաջադրվել է միանգամից 2 թեկնածու՝ ՀՀԿ անդամ Արթուր Ստեփանյանը եւ ներկայիս պատգամավոր, «Բարգավաճ Հայաստան» կուսակցության անդամ Աշոտ Տոնոյանը (Տոնուսի Աշոտ):
Թիվ 4-ում (Արաբկիր) այսօր առաջադրվել է «ՍԱՍ» սուպերմարկետների ցանցի սեփականատեր, ՀՀԿ-անդամ Արտակ Սարգսյանը, իսկ թիվ 5-ում՝ (Դավիթաշեն, Արաբկիր) Դավիթաշենի վարչական շրջանի ղեկավար, ոստիկանապետ Վլադիմիր Գասպարյանի փեսա Արթուր Գեւորգյանը:
Թիվ 6-ում (Աջափնյակ) առաջադրվել է գլխավոր դատախազի եղբայր, ՀՀԿ անդամ Աջափնյակի վարչական շրջանի ղեկավար Ռուբեն Հովսեփյանը, իսկ թիվ 9 ընտրատարածքում (Կենտրոն)՝ ՀՀԿ-ական պատգամավոր Ռուբեն Սադոյանը:
Կենտրոնական ընտրական հանձնաժողովից «Հետքին» տեղեկացրին, որ այսօր որեւէ կուսակցություն կամ դաշինք առաջադրվելու փաստաթղթեր չի ներկայացրել:
ՀՀԿ-ից էլ տեղեկացրին, որ որոշ ընտրատարածքներում արդեն հստակեցվել է, թե ովքեր են լինելու իրենց թեկնածուները:
Թիվ 1 ընտրատարածքում (Ավան, Նոր Նորք) ՀՀԿ-ն սատարելու է Երեւանի մանկավարժական համալսարանի պատմության եւ իրավագիտության ֆակուլտետի դեկան Էդիկ Գեւորգյանին:
Թիվ 7 ընտրատարածքից (Մալաթիա-Սեբաստիա, Աջափնյակ) առաջադրվելու է գործարար պատգամավոր Սամվել Ալեքսանյանը: Թիվ 8-ում (Մալաթիա-Սեբաստիա, Շենգավիթ)՝ ՀՀԿ-ի կողմից ընտրապայքարի մեջ կմտնի Սամվել Ալեքսանյանի փեսան՝ պատգամավոր Կորյուն Նահապետյանը:
Այլ թեկնածուներին կանդրադառնանք առաջիկայում:
Մեկնաբանել