Մրգերի և բանջար-բոստանային մշակաբույսերի արտադրության առումով այս տարին բարենպաստ էր, սակայն այլ է վիճակը հացահատիկի և անասնակերի առումով: Չնայած գյուղացիները վաղուց արդեն հնձել, հավաքել, տեղափոխել և պահեստավորել են իրենց համայնքներին պատկանող հողային տարածքների խոտը, սակայն երկրում առկա է անասնակերի մեծ դեֆիցիտ. այն չի բավականացնում:

Գյուղացիները ստիպված համապատասխան գյուղտեխնիկան տեղափոխել են լեռնային և նախալեռնային տարածքներ և դժվարությամբ հնձում, հավաքում և տեղափոխում են նաև տեղի խոտհարքների և արոտավայրերի խոտը, որոշ գյուղացիներ էլ փորձում են խոտ հավաքել անտառային տարածքներից: Սակայն ոչ բոլոր գյուղացիներն են ի վիճակի օգտվելու արոտավայրերից, խոտհարքներից կամ անտառից:

Խոտի սակավության պատճառով թանկացել է խոտի գինը. 1 հակը վաճառվում է 1200-ից 1600 դրամով: Հիշեցնեմ, որ 1 կովը օրական ուտում է միջինը 1 հակ խոտ: Գյուղացիները խուճապի մեջ են, և վախենալով խոտի պակասությունից, սկսել են մորթել կամ վաճառել իրենց անասունները: Օրինակ՝ եթե նախկինում 1 հորթը վաճառվում էր մոտ 150 հազար դրամով, հիմա այն կարելի է գնել մոտ 100 հազարով: Մտավախություն կա, որ առաջիկայում կարող է սկսվել անասնագլխաքանակի անկում` զանգվածային մորթի պատճառով: Չի բացառվում, որ մինչև տարվա վերջ անասնագլխաքանակը նվազի կիսով չափ:

Գյուղնախարարը հուսադրում է, որ անասնակերի պրոբլեմ չենք ունենա, քանի որ պայմանավորվածություն կա Արցախից այն ներկրելու վերաբերյալ: Այստեղ բազմաթիվ հարցեր են ծագում. ինչպե՞ս, ե՞րբ, ի՞նչ գնով և այլն: Զերծ մնալով երևակայական այս տարբերակը քննության առնելուց՝ գյուղնախարարին ուզում եմ պարզապես հարցնել. Դուք տեղյա՞կ եք, որ վերջին ժամանակներս պարսկական փակ բեռնատարներով խոտ է արտահանվում Իրանի Իսլամական Հանրապետություն: Գյուղերից տեղեկություն կա, որ պարսիկներին հակը վաճառվում է ավելի բարձր գներով` 1800-ից 2000 դրամ: Ճիշտ է՝ վաճառքի գինը շահավետ է խոտ ունեցող գյուղացու համար, սակայն կարծում եմ, որերբ երկրի ներսում կա անասնակերի դեֆիցիտ, կառավարությունը պետք է արգելափակի անասնակերի արտահանումը:

Մի պահ պատկերացնենք, թե ինչ կլինի, եթե սկսվի զանգվածային մորթ. եկող տարի մսի գինը կտրուկ կբարձրանա, կաթը և կաթնեղենը նույնպես կթանկանան: Վիճակից կօգտվեն որոշ օլիգարխ գործարարներ և կսկսեն ՀՀ ներկրել էժան և անորակ գոմեշի միս, կվաճառեն մեր աղքատ բնակչությանը, ինչպես ամերիկյան անորակ հավի բդերը:

Հարգելի պարոններ, քանի դեռ ուշ չէ, արգելափակեք անասնակերի արտահանումը ՀՀ-ից, այլապես «հառաջադիմություն պոռալով» ևս մեկ խոշոր քայլ կկատարեք դեպի մեր գյուղատնտեսության անկումը:

Սարգիս Սեդրակյան
«Ֆերմերային շարժում» ՀԿ նախագահ