Ինչպես են փոշիացվում պետական միջոցները. Կենտրոնական բանկ (մաս 1)
Տարիներ շարունակ Կենտրոնական բանկին հատկացվող միջոցների, այնտեղ բարձր պաշտոններ զբաղեցնողների աշխատավարձերի մասին մամուլը բարձրաձայնել է, սակայն անօգուտ: Այդ կառույցում շարունակում են ցոփ ու շվայտ կյանքով ապրել՝ ծախսելով օրվա հացը մի կերպ վաստակող ՀՀ քաղաքացու վճարած հարկերը:
Ընդհանուր պատկերացում կազմելու համար ներկայացնում ենք «Կենտրոնական բանկի 2013թ. վարչական ծախսերի նախահաշվի և կապիտալ ներդրումների ծրագրի» մեկնաբանությունները (հավելված 11):
Ըստ այդ մեկնաբանությունների՝ Կենտրոնական բանկի աշխատավարձ և նրան հավասարեցված միջոցները 2013թ. կազմում են 4 միլիարդ 860 միլիոն 488 հազար դրամ: ԿԲ-ի աշխատակիցների միջին աշխատավարձը այս տարվա համար պլանավորվել է 500 հազար դրամ, իսկ աշխատակիցների թիվը՝ 810 մարդ:
Բյուջեով միայն 390 միլիոն 500 հազար դրամ նախատեսված է աշխատակիցների առողջությունն ապահովելու և այլ սոցիալական ծախսերը հոգալու համար:
Ահռելի է նաև անձնակազմի գործուղումների համար նախատեսված գումարը՝ 432 միլիոն 757 հազար դրամ:
ՀՀ տարածքում ուսուցման և վերապատրաստման ծախսերը 2013թ. պլանավորվել են 70 միլիոն 342 հազար դրամ՝ նախորդ տարվա 69 միլիոն 703 հազար դրամի դիմաց:
ԿԲ աշխատակիցների օտար լեզուների իմացության մակարդակը գնահատելու համար նախատեսվել է 1 միլիոն դրամ՝ համապատասխան թեստեր մշակելու և դրանք կիրառելու նպատակով:
Ծառայողական փոխադրամիջոցների շահագործում՝ 97 միլիոն 909 հազար դրամ
Այս տարի ԿԲ-ում շահագործվելու է 29 ավտոմեքենա: 2013թ. ծառայողական փոխադրամիջոցների սպասարկման համար նախատեսվող գումարը մեկ ավտոմեքենայի համար կազմելու է ամսական 77 հազար դրամ:
Բանկի ներքին կարգերի համաձայն՝ ԿԲ-ում տարեկան ծախսվում է մոտ 95 հազար 880 լիտր բենզին, որի գինը 530 դրամով հաշվելու դեպքում, տարեկան ծախսը կազմում է 50 միլիոն 816 հազար 400 դրամ:
Նույն կարգերով ԿԲ-ում տարեկան ծախսվում է մոտ 34 հազար 240 լիտր դիզելային վառելիք, որի գինը 470 դրամով հաշվելու դեպքում, տարեկան ծախսը կազմում է մոտ 16 միլիոն 93 հազար դրամ:
Միայն քսայուղեր ձեռք բերելու համար 2013թ. նախատեսվում է 2 միլիոն 204 հազար դրամ: Իսկ ԿԲ-ի 29 ավտոմեքենաների շարժիչների համար անհրաժեշտ է լինելու կիսասինթետիկ 10x40 ստանդարտներին համապատասխան բարձրորակ յուղ, որի շուկայական արժեքը 5 լիտրի համար կազմում է 19 հազար դրամ:
Նախատեսվում է յուրաքանչյուր ավտոմեքենայի համար տարեկան 4 անգամ փոխել յուղը: Յուղը մեկ անգամ փոխելու արժեքը կազմում է 19 հազար դրամ:
ԿԲ-ում միայն 2 միլիոն դրամ նախատեսել են տեխնիկական զննման, պետավտոտեսչության և այլ հնարավոր ծախսերի իրականացման նպատակով:
Ֆիլմի և տեսահոլովակի նկարահանման ծախսեր
Պարզվում է՝ ԿԲ-ն այս տարի ֆիլմ և տեսահոլովակ է պատրաստվում նկարել՝ բացատրական և գովազդային տարբեր տեսահոլովակների նկարահանման, ռադիոգովազդների հեռարձակման համար, որոնց ծախսերը կկազմեն 20 մլն դրամ: Դրանից 6 մլն դրամը նախատեսվում է ռադիոգավազդների և հեռուստագովազդների պատրաստման, իսկ 14 մլն-ը՝ ռադիոգավազդների և հեռուստագովազդների հեռարձակման համար:
ԿԲ-ի հաշվարկով 30 վայրկյանանոց ռադիոգովազդի պատրաստման ծախսը միջինում կազմում է 25 հազար դրամ, իսկ 1 ամիս տևողությամբ հեռարձակումը 1 ռադիոկայանով՝ 450 հազար դրամ:
2013 թ. նախատեսվում է պատրաստել մի քանի ռադիոգովազդ և դրանք տարբեր ժամանակահատվածներով հեռարձակել 3-4 ռադիոկայանով:
Նույն հաշվարկով 2 րոպե տևողությամբ տեսահոլովակի նկարահանման ծախսը կազմում է 3 մլն դրամ: 2013թ. նախատեսվում է պատրաստել 2 տեսահոլովակ՝ ընդհանուր 6 մլն դրամ արժողությամբ: Դրանք հեռարձակվելու են 4-5 հեռուստաընկերությամբ: ԿԲ-ն գովազդային արշավները նախատեսում է իրականացնել տարեկան երկու անգամ:
«Պրայմ թայմ» համարվող ժամերին հեռարձակման ծախսերը 2012թ. ընթացիկ գներով կազմում են՝
Հ1 - 1 րոպեն՝ 150 հազար դրամ,
«Արմենիա» - 1 րոպեն՝ 250 հազար դրամ,
«Շանթ» - 1 րոպեն՝ 280 հազար դրամ,
«Արմնյուզ» - 1 րոպեն՝ 16 հազար դրամ:
Պատկերացում կազմելու համար, թե ԿԲ-ն որքան գումար է պետական բյուջեից ծախսում տեսահոլովակների նկարահանման ու հեռարձակման վրա, տեղեկացնենք, որ միայն 2010թ. գարնան ամիսներին 4 հեռուստաալիքով հեռարձակված դրամի մասին 6 տեսահոլովակի ծախսը կազմել է 7 միլիոն 758 հազար դրամ:
Նույն տարվա աշնանը նկարահանվել է ԱՊՊԱ-ի ներդրման մասին 8 հատ տեղեկատվական հոլովակ՝ 23 միլիոն 387 հազար 500 դրամ արժողությամբ, որոնց հեռարձակումը 4 հեռուստաընկերությամբ արժեցել է 48 միլիոն 638 հազար 833 դրամ:
Շարունակելի
Մեկնաբանել